"İcraiyyə Komitəsinin son qərarlarını dəstəkləyirik. Əvəzedicilərin çempionatının ayrı keçirilməsi lap yaxşı oldu. Bununla 1-ci divizionda həm komanda sayı, həm də səviyyənin artacağını düşünürəm. Əslində biz ötən ildən divizionda çıxış etməyə hazır idik, sənədlərimizi də təqdim etmişdik. Yalnız stadion probleminə görə çıxışımıza icazə verilmədi. Əvvəlcə Beyləqan Olimpiya İdman Kompleksində ev oyunlarımızı keçirmək istəyirdik, amma standartlara uyğun gəlmədi. Bu mövsüm də uğurlu çıxış edirik, 10 oyunda maksimum nəticə göstərmişik. Çempion kimi 1-ci diviziona yüksəlmək istəyirik. AFFA-nın divizion komandalarına 300 min manat ayırması da yaxşı haldı. Amma düşünürəm ki, bu yardım yetərli deyil. Hər bir klub ilk növbədə öz ayaqları üzərində durmağı bacarmalı, minimum ehtiyaclarını qarşılayacaq sponsorlar tapmalıdı. Biz hələ ki öz imkanlarımıza ayaqda durmağı bacarmışıq. Onu da bilirik ki, hazırkı maddi durumumuz 1-ci divizionda iştirak üçün yetərli deyil. Ona görə də bunu yaxşılaşdırmalıyıq. AFFA-nın da ayıracağı 300 min manatla daha yaxşı komanda formalaşdıra biləcəyimizə inanıram. 1-ci divizionda bölgə komandalarının maksimum çox olmasını istəyərdim. Əsasən də Cənub və Şimal bölgələrimizin komandalarını. Şəxsi təcrübəmizdən bilirik ki, Cənub komandalarıyla oyunlarımız çox gərgin keçib, onların güclü azarkeş dəstəyi var. Həmçinin Şimal bölgəsi, əsasən də Qusar komandası haqda xoş sözlər deyərdim. Bundan başqa, işğaldan azad olunan rayonlarımızın ən azı 1 komandasının divizionda çıxış etməsini istərdim. Bunu sırf öz komandamız üçün demirəm. Biz olduq-olmadıq, Qarabağın digər şəhərlərini təmsil edəcək klubların olmasını zəruri hesab edirəm. Düzdü, azad olunan torpaqlarımızda hələ yenidənqurma işləri başa çatmayıb. Amma istisna hal kimi Qarabağ komandalarının müvəqqəti Bakıda məskişunlaşaraq 1-ci divizionda iştirakına icazə verilməsini istərdim. Cəbrayılın, Zəngilanın klubları var. Şuşa, Xocalı, Qubadlı və digər rayonlarımızın da komandalarının yaradılmasını istərdim".