“Braziliyanın növbəti məşqçisi kim olmalıdı” sualına cavab vermək çox çətindi. Ölkədə əcnəbi məşqçinin tərəfdarı olanlar az deyil. Əcnəbi məşqçi gəlsə, bu, Braziliyanın tarixində bir ilk olacaq. Bəli, bir müddət öncə Jorje Jezuşla bağlı çox söz-söhbət yayılmışdı. Eləcə də Karlo Ançelottinin adı hallanırdı. Nə olacağını bilmirik. Ona görə də gəlin tələsməyək və bir qədər də gözləyək. Kim bilir, bəlkə elə federasiya yerli məşqçi ilə anlaşdı. Jezuş barədə fikrimi bilmək istəyirsizsə, onu çox bəyənirəm. Güclü bir yığmanı çalışdırmaq üçün yetərincə təcrübəyə malikdi. Yaxşı məşqçi olduğunu qazandığı nəticələrlə sübut edib. Dünyanın bir çox yerində işləyib. Onun üstünlüyü odu ki, daha öncə ölkəmizdə çalışıb və Braziliyanı gözəl tanıyır. Braziliya ilə əlaqələrini kəsmir. İndi də “Fənərbaxça” kimi iddialı klubda çalışır. Türkiyənin 2002-dən bəri yana mundiallara qatılmaması üzücüdü. Xüsusilə də son DÇ-dən kənar qalmaları məni təəccübləndirdi. Ümid edirəm ki, növbəti mundialda mütləq yer alacaqlar. DÇ-2002-də ən çətin oyunlarımız məhz Türkiyəyə qarşı olmuşdu. Hasan Şaş, Yıldıray Baştürk, qapıçı Rüştü, Əmrə Belözoğlu kimi önəmli oyunçuları var idi. Ümumiyyətlə, Türkiyədə həmişə güclü oyunçular yetişib. Türkiyə mütləq AÇ-2024-də vəsiqə qazanmalıdı. Çünki heyət səviyyəlidi və belə böyük turnirlərdə iştirak etməyə qadirdi”.