Şakira ilə Xerar Pike arasında belə demək mümkünsə, soyuq müharibə davam edir.

Football-plus.az xəbər verir ki, dünyaca ünlü müğənni ilə məşhur futbolçunun təxminən 12 il davam edən eşq macərası ötən il başa çatmışdı.

“Barselona”nın və İspaniya yığmasının sabiq üzvünün çoxsaylı xəyanətləri dünyanın ən məşhur cütlüklərindən birinin ayrılmasına səbəb olmuşdu. Həmişə sevgisi ilə gündəmə gələn Şakira və Pike son dönəmlərdə bir-birinə yalnız acıq verir. Xəbər verdiyimiz kimi, kolumbiyalı müğənni bir müddət öncə argentinalı dicey Bizarrap ilə birlikdə bir mahnı oxuyaraq “yutub”a yerləşdirmişdi. Pikeyə həsr olunan mahnı bir gün ərzində baxış sayına görə “yutub”da rekord qırmışdı. Hzırda baxış sayı 235 milyonu ötüb. 35 yaşlı müğənni klipdə “sən “Ferrari”ni “Reno Tvinqo”ya, “Roleks”i “Kasio”ya dəyişdin” deyərək Pikeyə və onun yeni xanımı – 23 yaşlı Klara Çia Martiyə söz atmışdı. Sonrakı günlərdə Pike Şakiranın acığına həm qoluna “Kasio” firmasının saatını taxmış, həm də matçlardan birinə “Reno Tvinqo” ilə gəlmişdi. Yanvarın 26-da isə Pike belə desək, növbəti gedişini etdi. O, ilk dəfə sosial şəbəkədə yeni xanımı ilə birlikdə şəkil paylaşdı. Amma görünür, bu, Şakiranı o qədər də məyus etmədi. Məşhur müğənni həmin gün Barselonadakı malikanəsində dost-tanışını başına yığaraq “yutub”da rekord qırmasını təmtəraqlı şəkildə qeyd etdi. Özü də diqqəti çəkən odu ki, məclisə “Barselona”nın sabiq üzvü Patrik Klyuvert də təşrif buyurub. Deyilənə görə o, Şakira ilə qonşudu.

Bu arada “Marka” nəşrinin yazdığına inansaq, Şakira yeni klip çəkdirib və o da Pikeyə həsr olunub. Şakira bu dəfə həmyerlisi, daha bir populyar müğənni Karol G ilə duet oxuyub. Ən maraqlı məqam odu ki, klip “yutub”a fevralın 2-də yerləşdiriləcək. Həmin gün isə həm Şakiranın, həm də Pikenin ad günüdü! Deyilənə görə, klip iki gün ərzində araya-ərsəyə gətirilib. Çəkilişlər gündə 15 saat davam edib.