"Neftçi" oyuna daha yaxşı hazırlaşmışdı. Gümrah və istəkliydilər. "Qarabağ"da isə "Gent"lə matçdan sonra gərginlik, yorğunluq hiss olunurdu. Ağdam təmsilçisinin heyətində itkilər də vardı. Bundan başqa, avrokubok oyunu ilə müqayisədə heyətdə 7 dəyişiklik edilmişdi. İlk hissədə "ağ-qaralar" üstün performans sərgiləyərək, rəqibə göz açmağa imkan vermədi. Hətta qol vurandan sonra belə geri çəkilməyərək kreativ futbola üstünlük verdilər. Real qol epizodları da oldu, "Neftçi" fərqi 2 topa da çatdıra bilərdi. Lakin fasilədən sonra Qurban müəllimin əvəzetmələri sözünü dedi. Sona 20 dəqiqə qalmış "Qarabağ" təşəbbüsü ələ aldı. Bir-birinin ardınca hücumlar təşkil edən meydan sahibləri hesabı bərabərləşdirə bildi. Düşünürəm ki, son çempion məğlubiyyətdən qaçdı, "Neftçi" isə vacib 1 xal qazandı. "Qarabağ"ın yeni transferləri hələ faydalı deyillər. Cica bir qədər yaxşı vəziyyətdədi. Lakin Diakabi ilə Benzya 6 aydan çoxdu rəsmi matçlarda oynamayıblar. Odu ki, arzuolunan formada deyillər. Hələ üzərlərində çox işləməlidilər. Çempionluq məsələsinə gəlincə, "köhlən atlar"la ən yaxın izləyiciləri arasında yetərincə xal fərqi var. Bunu aradan qaldırmaq olduqca çətindi. Hələ onu da nəzərə alaq ki, "Qarabağ"ın avrokubok macərası bitib və bütün gücünü çempionata səfərbər edəcək. Komanda 3-cü dövrədəki matçların hamısında qələbə qazansa, düşünürəm ki, böyük ölçüdə çempionun adına aydınlıq gələcək. Belə də son dövrəni böyük ehtimalla yoldaşlıq oyunları kimi keçirəcək".