Fevralın 27-də keçirilən "Qarabağ" - "Neftçi" qarşılaşmasıyla Misli premyer-liqasında 24-cü tura yekun vuruldu. Gərgin keçən oyunda qalib müəyyənləşmədi - 1:1.

"Football-plus.az" olaraq, qarşılaşma ilə fikirlərini səsləndirməsi üçün Nicat Qurbanova tribuna verdik:

“Maraqlı matç oldu. Sadəcə, hava şəraiti azarkeşlərin oyunu izləməsində təsir edirdi. Futbolçular üçün isə dumanın təsiri yox idi və onlar meydanda normal futbol oynayırdı. İki fərqli hissə izlədik. İlk yarını "Neftçi"nin hesabına yazmaq olar. Üstün oyun sərgiləməklə hesabı açdılar. "Qarabağ"a rahat oynamağa imkan vermədilər. Amma ikinci hissədə Qurban Qurbanovun etdiyi dəyişikliklər bəhrə verdi. "Qarabağ" dominant futbol oynadı və təhlükəli hücumlar yaratmağa başladı. Əvəzetmədən meydana çıxanlar ağırlıqlarını qoydular və hesab bərabərləşdi. Nəticənin oyuna görə olduğunu düşünürəm. Ümumiyyətlə, heç bir sahədə asan iş olmur. Hər yaxşı nəticənin arxasında böyük zəhmət dayanır. “Qarabağ” rəqiblərindən xal fərqinə görə bir az öndədi. Bu da onların çempionluğa ən real namizəd olduğunu göstərir. Lakin hələ heç nə həll olunmayıb. Qarşıda oyun çoxdu".

ABDULLA İSMAYILOĞLU