Premyer-liqada daha bir oyun həftəsini geridə qoyduq.

Hər nə qədər istəməsək də, hər tur olduğu kimi, bu dəfə də yarıtmaz hakimlikdən danışmağa məcburuq. Xüsusilə həftənin mərkəzi qarşılaşmasında, “Qarabağ” – Sabah” matçında Elçin Məsiyevin kobud səhvi xeyli müzakirə olundu.

Qəbələ - Neftçi, FƏRİD HACIYEV
Matç qolsuz başa çatsa da, qonaqların baş məşqçisi Laurentsiu Regekampf baş hakimdən ağızdolusu şikayət etdi. Əslində Hacıyev yaddaqalan, nəticəyə təsir edən səhvə yol vermədi. İstisna kimi “Neftçi”nin qapısına təyin edib, VAR-a baxandan sonra ləğv etdiyi penaltini göstərmək olar. Həmin an Höccətin Rövlana təması olmadığı təkrardan da göründü. Sadəcə, rumuniyalı mütəxəssisin xoşuna gəlməyən Fərid bəyin sonda ona “get, komandana futbol oynat” deməsi olub. Ancaq “Neftçi”nin məşqçisinin səsləndirdiyi “hakim tez-tez fit çalmaqla oyunun tempini öldürdü” fikri ilə razılaşmaq olar.

Turan Tovuz – Kəpəz, CAVİD CƏLİLOV
Adətən, Qərb derbisi qalmaqallar, dava-dalaş, hakim səhvləri ilə yadda qalır. Ancaq bu dəfə idarəçilik, demək olar ki, yüksək səviyyədə idi. Cəlilov 90 dəqiqə oyunun “ip”ini əldən vermədi. Qətiyyətli qərarları ilə hər iki komandanın üzvlərinə meydanda kimin söz sahibi olduğunu göstərdi.

Sumqayıt – Şamaxı, RƏVAN HƏMZƏZADƏ
90 dəqiqə ərzində Rəvan Həmzəzadə matçın axarına xələl gətirəcək qərarlar vermədi. 21-ci dəqiqədə meydan sahiblərinin xeyrinə penalti təyin etsə də, VAR-dan gələn siqnaldan sonra epizodun təkrarına baxdı və qərarını ləğv etdi. Oyunda sürətin, tempin aşağı düşməsinə imkan vermədi. Cəmi 4 dəfə əlini cibinə atdı ki, göstərilən sarı vərəqələrin də biri ilk hissədə qeydə alındı. Ümumiyyətlə, hər iki komandanın oyunçularına bərabər sayda rəsmi xəbərdarlıq etdi.

Qarabağ – Sabah, ELÇİN MƏSİYEV
FİFA referisi bu görüşün öhfəsindən gəlmədi. Hətta deyərdik ki, daha da gərginləşdirdi. Onun qərarları qətiyyən anlaşılan deyildi. Matçın ilk hissəsində Ramil Şeydayevin başla qapıya göndərdiyi top sanki Boyan Letiçin əlinə dəymişdi. Hər halda, kənardan belə göründü. Lakin Məsiyev fərqli fikirdə idi. O, müdafiəçinin sinəsilə topa müdaxilə etdiyini söyləyərək oyunu davam etdirdi. Ən bərbad qərar isə 56-cı dəqiqədəki epizod zamanı verildi. Kristian da Silvanın zərbəsindən sonra top Julio Romaonun əlinə dəysə də, Məsiyev yenə davam işarəsi verdi. O, VAR-a baxsa da, fikrini dəyişməyərək penaltini qeydə almadı. Bu yerdə "Sabah"ın haqqının yeyildiyini söyləyə bilərik. Abdulla Zubirin ayağına cərimə meydançasındakı toxunuşa görə isə “Sabah”ın qapısına penalti təyin edə bilərdi. Amma bunu da etmədi və oyundan sonra haqlı tənqidlərlə üzləşdi. Daha bir incə məqam: Yankoviç oyunboyu hakimdən qərarlarına görə izahat tələb etdi və cəzalanmadı. Halbuki monteneqrolu yarımmüdafiəçi komandanın kapitanı deyil və nədən özünə belə əl qatdığı bilinmədi.

Səbail – Zirə, RAUF CABBAROV
FİFA referisi görüşü ideala yaxın idarə etdi. Verdiyi bütün qərarlarda haqlı idi. O, bütün epizodları yaxından izləyirdi. Sadəcə, görüşün ilk hissəsi maraqsız olduğundan Cabbarovun idarəçiliyi çox ön plana çıxmadı. Məşqçilərin oyundan sonra hakimlik haqda nəsə deməməsi də fikirlərimizi təsdiqləyir. Sadəcə, Cabbarov bəzən meydanda düzgün mövqe seçmirdi. Məhz bu üzdən “dənizçilər”in 84-cü dəqiqədəki perspektivli hücumunun qarşısını aldı.