Məlum olduğu kimi dünən atılan püşkün nəticəsinə görə ''Fənərbaxça'' Avropa Liqasının 1/8 finalında ''Sevilya'' ilə qarşılaşacaq. İspaniyanın köklü klublarından olan ''Sevilya'' bu turniri hamıdan çox – 6 dəfə qazanıb.

Yeri gəlmişkən, bu kollektivlərin yolu 2007/08-də ÇL-in 1/8 finalında da kəsişmişdi. Həmin tarixi duel zamanı hər iki klub öz meydanında 3:2 hesabı ilə qalib gəlmiş və oyunsonrası penaltilər seriyasında İstanbul nəhəngi üstün olmuşdu.

''Sevilya''da prezidentin köməkçisi vəzifəsini icra edən Xose Mariya del Nido Karrasko ''Fənər''lə oyunlar barədə bunları deyib: ''Ənənələri olan bir komanda ilə oynayacağıq.

Avrokuboklara həmişə yaxşı köklənən və coşqulu azarkeşlərə malik olan bir kollektivdi. 15 il öncə onlara qarşı dueldən məğlub ayrılmışdıq.

''Fənərbaxça'' həqiqətən də yaxşı və məğlub olmağı sevməyən klubdu. Başlarında da çox təcrübəli mütəxəssis dayanıb.

İrəlidə Valensiya və Batşuayi kimi iki önəmli qol silahları var. Düzdü, püşk bizə səviyyəcə nisbətən daha zəif rəqib bəxş edə bilərdi. Amma biz bu turniri 6 dəfə qazanmış komandayıq. Heç kimdən çəkinmirik. 7-ci dəfə onu başımızın üzərinə qaldırmağa çalışacağıq. Hər iki oyunda da baxımlı futbol sərgiləməklə mərhələni adlamaq istəyirik''.

Qeyd edək ki, ''Sevilya''da ''Fənər''in əzəli rəqibi ''Qalatasaray''ın 3 sabiq futbolçusu – Markao, Aleks Telyes və Fernando top qovur.