Basketbol üzrə Avroliqanın cari mövsümündə keçirdiyi 24 oyunun yalnız 8-də qalib gəlməklə 16-cı pillədə qərarlaşan “Panatinaikos” Deyan Radoniçi istefaya göndərib.

Football-plus.az xəbər verir ki, əslində bu qərar təkcə Avroliqadakı zəif çıxışla bağlı deyil. Afina nəhənginin rəhbərliyi monteneqrolu mütəxəssisə ölkə kubokunun yarımfinalında əzəli rəqib “Olimpiakos”a məğlubiyyəti (65:81) bağışlamayıb. Klubla Radoniç arasında onun 2022/23 mövsümü üçün nəzərdə tutulan maaşın hamısını, növbəti mövsüm üçün isə yarısını almasıyla bağlı razılıq əldə olunub. Yunanıstan mənbələri baş məşqçi səlahiyyətlərini mövsümün sonuna qədər Xristos Serelisin yerinə yetirəcəyini xəbər verir.

Bu arada “Real”ın sabiq baş məşqçisi Pablo Lasonun məhz “Pao”dan təklif gözlədiyinə görə İsrail yığmasını çalışdırmaqdan imtina etdiyi deyilir. Halbuki İsrail Basketbol Federasiyasının rəhbərliyi 55 yaşlı mütəxəssisi yığmaya rəhbərlik etməyə razı salmaq üçün onunla görüş keçirmişdi. Laso klub səviyyədə çalışmaq, xüsusən də Avroliqada mübarizə aparan komandanın “sükanı arxasına” keçmək istəyir. Çox güman, yayda məhz “Panatinaikos”u çalışdırmağa başlayacaq.

Xatırladaq ki, ispaniyalı məşqçi 2022-ci ilin iyununda ürəktutması keçirəndən sonra “Real”dan qovulub. Mütəxəssis bir müddət əvvəl özünü yaxşı hiss etdiyini və işləməyə hazır olduğunu bildirib. Laso “Real”a ikisi Avroliqa çempionluğu olmaqla 22 titul qazandırıb.