Türkiyəni basketbol üzrə Avroliqada təmsil edən iki komandadan biri - “Fənərbaxça” baş məşqçi Aleksandar Corceviçin baş məşqçi postundan getdiyini elan edib.

O, “sarı-lacivərdlilər”i ötən ildən bəri çalışdırırdı. Komanda serb mütəxəssisin rəhbərliyi altında 10-cu dəfə ölkə çempionu olub, özü də finalda Avroliqanın son qalibi “Efes”i məğlub etməklə. Görünür, rəhbərlik Avroliqadakı uğursuzluğu Corceviçə bağışlamayıb. Onun əvvəllər “Virtus”, “Bavariya”, “Panatinaikos”, “Benetton”, “Milan” və Serbiya yığmasında çalışdığını da xatırladaq.

Artıq Corceviçin əvəzedicisi də məlumdu. “Sükan arxasına” Dimitris İtudis keçib. 51 yaşlı yunan mütəxəssus Türkiyə klubu ilə 3 illik müqavilə bağlayıb. O, “Fənərbaxça” ilə yanaşı, Yunanıstan yığmasını da çalışdıracaq.

İtudisin əvvəlki komandası ÇSKA olub. Yunan mütəxəssis 2014-ün iyunundan bu ilin iyunun qədər çalışdırdığı “hərbçilər”i iki dəfə Avroliqanın, altı dəfə VTB Vahid liqasının qalibi edib. Bu arada “Fənərbaxça” Conatan Motlini də heyətinə qatıb. İyunun 18-də “Lokomotiv-Kuban”ı tərk edən 27 yaşlı amerikalı Türkiyə klubu ilə ikiillik müqavilə bağlayıb.