Türkiyənin dəhşətli zəlzələdən sonra özünə gəlməyə çalışdığı indiki günlərdə “Kayserispor”la “Beşiktaş” arasında əməlli-başlı qalmaqal yaşanır.

Football-plus.az xəbər verir ki, İstanbul nəhəngi fevralın 8-də Kayseri təmsilçisindən sağ cinah müdafiəçisi Onur Bulutun transfer edildiyini rəsmən açıqlamışdı. Amma keçid çox böyük qalmaqalla müşayiət olunur. Kimin haqlı, kimin haqsız olduğuna isə Türkiyə Futbol Federasiyasının nəzdində fəaliyyət göstərən Problemli Məsələlərin Həlli Komitəsi qərar verəcək. Çünki “Kayserispor” qarşı tərəfdən məhz bu komitəyə şikayət ünvanlayıb.

Almaniyada doğulan və 2021-dən bəri “Kayserispor”un şərəfini qoruyan Onur Bulutun transferi ilə bağlı detallara diqqət yetirək. Əslində bu futbolçu “transfer pəncərəsi” açıldığı vaxtdan etibarən “Fənərbaxça”nın hədəfində idi. İki klub arasında 2,9 milyon avroluq ilkin anlaşma əldə olunmuşdu. “Kayserispor”un Mame Tiam transferinə görə “Fənər”ə əvvəlcədən 1,6 milyon avroluq borcu var idi. Onurun transferinin qarşılığında həm bu borc silinməli, həm də “sarı-lacivərdlilər” əlavə 1,3 milyon avro ödəməli idilər. Yalnız futbolçunun özü ilə “Fənərbaxça” arasında anlaşmanın əldə olunması qalırdı. Amma bu anlaşma əldə olunmadı. Nəticədə Onur Bulut “Kayserispor”la üçillik yeni müqavilə imzaladı. Türkiyə mətbuatı iddia edirdi ki, müqavilədə xüsusi şərtlər var. Söhbət “Fənər” üçün qeyd olunmuş güzəştlərdən gedir. Fevralın 6-na qədər yalnız “Fənər”in bu futbolçunu pulsuz heyətinə qatmaq fürsəti var idi. Fevralın 6-dan sonra isə başqa istənilən klub Onuru transfer etmək üçün 1 milyon avro təzminat ödəməliydi.

Artıq qeyd etdiyimiz kimi, fevralın 8-də “Beşiktaş” qarşı tərəfə 1 milyon avro ödəyərək Bulutu heyətində qatdı. Kayseri təmsilçisinin başqan vəkili Nürəddin Açıkalının pulu qəbul edərək müqaviləyə qol çəkməsi üzündən “Qartal” problem olmayacağını düşünərək transferi rəsmən açıqladı. Amma çox keçmədən Kayseri rəhbərliyi əl-ayağa düşdü. Rəhbərlik bildirdi ki, başqan vəkilinin pulu qəbul etmək və transferə razılıq vermək hüququ yoxdu. Bu üzdən 1 milyon avro “Beşiktaş”a geri göndərildi. “Sarı-qırmızılar” müqavilədə 1 milyon avroluq təzminatın olmadığını iddia edir və qarşı tərəfdən 3,5 milyon avro təzminat tələb edir. Maraqlıdı ki, “Beşiktaş” ikinci dəfə 1 milyon avronu Kayseri klubunun hesabına köcürsə də, “Kayserispor” yenidən o pulu geri göndərdi. Onur Bulutun meneceri Elyasa Sümə iddia edir ki, istənilən yerdə “Kayserispor” rəhbərliyi ilə canlı yayına çıxmağa hazırdı. Onun sözlərinə görə, anlaşma Kayseri klubunun bazasında əldə olunmuşdu və həmin vaxt prezident də daxil olmaqla klubun bütün yönəticiləri orda idi. Elyasa Sümə “ortada yanlış bir şey varsa, ən böyük şərəfsiz mənəm və menecerlik fəaliyyətimə də son qoymağa hazıram” deyib.

“Beşiktaş” rəhbərliyi bu məsələdə özünü haqlı sayır. Klub rəsmiləri əllərində sübutların olduğunu idda edir və mövqelərini sona qədər qorumağa hazırdılar. Futbolçu özü də məsələ ilə bağlı geniş bir yazılı açıqlama verib.

Onur Bulut onu aldatmağa çalışan “Kayserispor”un bütün rəsmilərindən məhkəməyə şikayət etdiyini vurğulayıb.