Türkiyə klublarının xarici klublara oyunçu satışı ilə bağlı diqqətçəkən rəqəmlər ortaya çıxıb. Məlum olub ki, qardaş ölkə təmsilçiləri son 5 ildə xaricə 72 futbolçu satıblar və satışdan ümumilikdə 264,2 milyon avro gəlir əldə olunub! Məsələn, bu yay ''Fənərbaxça''dan Ozan Tufan ilə Allahyar Səyyadmaneş, eləcə də ''Antalyaspor''dan Doğukan Sinik ''Hall Siti''yə, ''Kayserispor''dan Əmrə Dəmir ''Barselona B''yə, ''Göztəpə''dən Xəlil Akbunar ''Vesterlo''ya, ''Qalatasaray''dan Markao ''Sevilya''ya, Ozornvafor ''Şarlerua''ya, ''Fatih Karagümrük''dən Peşiç ''Srvena Zvezda''ya və son olaraq Rıdvan Yılmaz ''Beşiktaş''dan ''Reyncers''ə transfer olunub. Bu beşillik müddətdə 70 milyon avroluq gəliri ilə ''Fənərbaxça'' oyunçu satışından ən cox pul qazanan Türkiyə klubudu. Digər pillələrdə uyğun olaraq ''Qalatasaray'' (50,1 milyon avro), ''Trabzonspor'' (35), ''Beşiktaş'' (20), ''Alanyaspor'' (12,5), ''Yeni Malatyaspor'' (12) və ''Kasımpaşa'' (10,9) qərarlaşıb. Üstəlik Kim Min Çje də 20 milyon avroya ''Fənər''dən ''Napoli''yə keçmək üzrədi və bu transfer bu siyahıda hələ qeyd olunmayıb. Ölkələr üzrə isə superliqa klubları Səudiyyə Ərəbistanı ilə İtaliyaya 10, Fransa və İngiltərəyə 6, Çin və İspaniyaya 5, Belçikaya 4 oyunçu satıblar.