“Səbail”in baş məşqçisi Mahmud Qurbanov hakimlərlə bağlı şikayətdolu açıqlama verdi.

Mütəxəssis “Qəbələ” ilə 16-cı turun oyunundan sonra dözə bilmədi və bütün narazılığını dilə gətirdi. O açıqlamasında elə “qırmızı-qaralar”la qarşılaşmada da hakim səhvlərinin olduğunu vurğuladı. Bundan əlavə, premyer-liqanın öncəki bir neçə turunda da hakimlərin səhv qərarlarının qurbanı olduqlarını bildirdi. Bütün bunları nəzərə alaraq Mahmud Qurbanovun iradlarında nə dərəcədə haqlı olduğunu üzə çıxarmaq üçün onun qeyd etdiyi oyunlardakı mübahisəli epizodları bir daha nəzərdən keçirdik. Və məlum oldu ki, mütəxəssisin iradlarının, hakimləri qərəzli idarəçilikdə suçlamasının ciddi əsası yoxdu. Mahmud bəy onlara “yüklənməkdənsə”, komandasını “qara zolaq”dan çıxarmağın yolları üzərində baş sındırsa, vaxtını daha çox buna ayırsa, yaxşıdı.

10-cu tur, Turan Tovuz – Səbail 2:2
Oyunun 57-ci dəqiqəsində “Səbail”in xeyrinə penalti təyin olundu. Baş hakim Kamal Umudlu topun “Turan Tovuz”un müdafiəçisi Şakir Seyidovun əlinə dəydiyini bildirdi. Lakin referi daha sonra özü VAR-a müraciət edərək monitora yaxınlaşdı. Qısa təhlildən sonra o penalti qərarını ləğv etdi. Buna səbəb topun rəqib müdafiəçidən öncə “Səbail”in futbolçusu Ağabala Ramazanovun əlinə dəyməsi idi. Mahmud Qurbanov bu epizodla bağlı da iradını səsləndirib. Lakin bunun heç də əsaslı olmadığı aşkar görünür. Çünki top öncə Ramazanovun açıq əlinə dəyir, daha sonra Seyidov ona əllə toxunur. Bu səbəbdən penalti meydan sahiblərinin lehinə verilən cərimə zərbəsi qərarı ilə əvəzləndi.

11-ci tur, Səbail – Şamaxı 0:0
Bu görüşün son dəqiqələrində meydan sahibləri hücuma atıldı. Top yan xətdən oyuna daxil edildi. Lakin bundan sonra baş hakim İnqilab Məmmədov oyundankınar vəziyyət qeydə aldı. Mahmud Qurbanov bu epizoddakı hakim səhvinə həm oyun zamanı, həm də bir neçə gün öncə verdiyi açıqlamada da toxundu. Təcrübəli mütəxəsiss qarşılaşmadan sonra verdiyi açıqlamada bunun həm gülməli, həm də acınacaqlı olduğunu bildirdi. Həqiqətən də, top oyuna autdan daxil edildi. Futbol qaydalarına görə isə top yan xətdən oyuna daxil edilərkən ofsayd qeydə alına bilməz. Bu səbəbdən Mahmud Qurbanov həmin epizodla bağlı iradında tam haqlıdı.

13-cü tur, Səbail – Sabah 0:2
Bu matçda da Mahmud Qurbanov hakim səhvlərinin olduğunu bildirir. Xüsusən də rəqib qapısına penalti təyin olunmadığını düşünür. Bu epizoda dəfələrlə baxmağa ehtiyac qalmadı. Elə ilk baxışdan Zakpanın topu qapıdan keçirə bilmədikdən sonra hücumun davamında özünü yerə atdığı görünür. Bəlkə də müəyyən təmas var idi. Amma bu penaltiyə əsas verən epizod deyil. Bir sözlə, baş hakim Əliyar Ağayev qaydalar çərçivəsində davranıb.

16-cı tur, Qəbələ - Səbail 2:1
Mahmud Qurbanov uduzduqları oyunun idarəçiliyindən narazı qaldı. O ilk olaraq 9-cu dəqiqədə komandasının hücumu zamanı Kizitonun cərimə meydançasında yerdə qaldığı epizodda penalti verilməli olduğunu iddia edib. Epizodu bir neçə dəfə nəzərdən keçirdik. Top qapı qarşısına ötürülərkən Kizitonu rəqib müdafiəçisi Renato bir qədər yavaşlatdı. Müdafiəçi rəqibin çiyninə yüngülcə toxunur. Lakin bu heç də 11 metrlik cərimə zərbəsinə əsas verən qayda pozuntusu deyil. Bu oyunla bağlı Qurbanovun daha bir şikayəti oldu. Belə ki, o, “Qəbələ”nin ikinci qolundan öncə topun Asif Məmmədovun əlinə dəydiyini bildirdi. Epizodu yenə bir neçə dəfə izlədik. Həqiqətən də, top “Qəbələ”nin kapitanının əlinə dəyib. Hətta futbolçunun topa əvvəlcə sol, daha sonra isə sağ əli ilə toxunduğu şübhəsi də yaranır. Hər halda, ən dəqiq görünən odu ki, top Məmmədovun sol əlinə həqiqətən dəyib. Lakin təcrübəli futbolçu bunu heç də bilərəkdən etmədi. Topun onun istiqamətində gəldiyini görən Məmmədov əlini çəkir. Top onun əlinə dəysə də, burda qayda pozuntusu yox idi. Bu səbəbdən görüşün baş hakimi Rəşad Əhmədov cərimə zərbəsi təyin etmədi.

ŞAİR ABDULLA