“Sözsüz ki, çatışmayan cəhətlər, özünü tam doğrultmayan planlar var. Yadınızdadısa, mövsümün əvvəlində də belə çətinliklə üzləşmişdik. Lakin toparlanmağı bacardıq və müəyyən dərəcədə irəliləyiş əldə etdik. Deməzdim ki, “qara zolaq”dayıq. Bu mənim şəxsi fikrimdi. Düşünürəm ki, əvvəlkinə nisbətən daha yaxşıyıq. Mövsümün ilk matçlarındakı performansa nisbətən meydanda fəallığımız artıb. Çatışmazlıqların olduğu sirr deyil. Bəlli problemlərin üzərində işləyirik və tezliklə istədiyimiz nəticəni qazanacağıq.

Rəqibdən asılı olmayaraq, bütün qarşılaşmalara köklənirik və meydana böyük motivasiya ilə çıxırıq. Matçlarda qələbə uğrunda mübarizə aparırıq.
Bildiyiniz kimi, “Şamaxı” sırf yerli futbolçulardan ibarət klubdu. Üstəlik, əksəriyyət gənclərdi. Hər şeyi sıfırdan başlamışıq. Yola çıxanda qarşıda bizi hansı problemlərin gözlədiyini bilirdik. İstər rəhbərlik, istərsə də məşqçi heyəti gözünü qırpmadan inkişaf üçün çalışır. Premyer-liqadakı mübarizəmizdə də bunu nəzərə alaraq “döyüşürük”. Potensial cəhətdən hələ ki bu mövsüm üçün böyük iddiamız olmaya bilər. Çünki indiki şəraitdə öncəliyimiz komandanı formalaşdırmaqdı”.