“Şamaxı” Şamaxını tərk edir - AÇIQLAMA
Yeni mövsümün hazırlığını davam etdirən “Şamaxı” hələ ki bir yoxlama oyununda gücünü sınayıb. Komanda Şamaxıda “Turan Tovuz”a 0:1 hesabı ilə uduzub.
Məlum olduğu kimi, “münəccimlər” heyətinin 60 faizindən çoxu ilə yolları ayırıb. Maraqlıdı, bu boşluq necə aradan qaldırılacaq? Komandanın qarşıdakı planları necədi?
Bu haqda məlumat almaq üçün “Şamaxı”nın baş meneceri Kamran İsmayılovla əlaqə saxladıq. Onun “Football-plus.az” saytına açıqlaması belə oldu:
“İyulun 20-də “Kəpəz”, 26-da isə U-19 millimizlə yoldaşlıq görüşü keçirəcəyimiz dəqiqləşdi. Mövsüm başa çatdıqdan sonra futbolçuların böyük əksəriyyəti ilə yollar ayrılmışdı. İndi isə heyətə yeni oyunçular cəlb etmişik. Bir neçəsi ilə hazırda danışıqlar gedir. Sadəcə, mətbuata ad açıqlamırıq. Çünki çempionatın startından öncə komandanın rəsmi təqdimatı olacaq. Yeni oyunçuların kimliyi və başqa məlumatlar o vaxt veriləcək. Məlum olduğu kimi, bu transferlər arasında legioner yoxdu. Hazırda Şamaxı şəhər stadionunda məşqlər davam edir. Sabah isə “Kəpəz”lə oyun üçün Bakıya gələcəyik”.
Rəhbərlik dəyişəndən sonra klubda kadr dəyişiklikləri də reallaşdı. Klubun mətbuat katibi Səbuhi Məmmədov “Futbol+”ə açıqlamasında komandada qalacağını bildirmişdi. Kamran İsmayılovla söhbətdə bu məsələni də dəqiqləşdirməyə çalışdıq:
“Səbuhi Məmmədov klubda qalacaq. Lakin hansı vəzifədə işinə davam edəcəyi haqda rəhbərlik qərar verəcək. Başqa vəzifəyə keçsə, o zaman kluba yeni mətbuat katibi təyin olunacaq. Hazırda bu məsələlər gündəmdədi”.
ŞAİR ABDULLA
