"Qarabağ" bu gün sübut etdi ki, bir oyunçudan asılı deyil" - Tahir Gözəl
Konfrans Liqasında pley-off mərhələsinə start verilib.
"Qarabağ" "Gent"i məğlub edib - 1:0. Oyundan sonra ağdamlıların prezidenti Tahir Gözəl jurnalistlərin suallarını cavablandırıb:
"Əlbəttə, ilk öncə Türkiyə xalqına təsəllimi bildirirəm. Türklər çətin günlərdə hər zaman bizə dəstək verdi. Sevinirəm ki, bu gün "Qarabağ" Azərbaycan tarixində ilkə imza atdı. Birinci dəfə pley-off mərhələlərində qələbə qazandıq. Hələ heç nə bitməyib. Cavab oyunu bizim üçün vacib və tarixidi. Heyətdə çoxlu dəyişikliklər oldu. Sevinirəm ki, "Qarabağ" bu gün sübut etdi ki, bir oyunçudan asılı deyil. "Qarabağ" Avropa ənənəsi olan bir klubdu. Komanda ilə fəxr edirəm".
- İlk oyundan sonra şanslarını necə dəyərləndirirsiz?
- Bugünkü oyuna baxanda insan ümidlənir. Rəqibin sürətli əks-hücumları var. Diqqətli olmalıyıq. Komandamıza yeni gələnlər var. İnanıram ki, cavab matçında da güclü "Qarabağ" meydanda olacaq.
- Avropa təcrübəsindən yararlanmağa başlamısız, yoxsa futbolçular klubda qalmaq istəmir?
- İlk öncə futbolçular komandada qalmaq istəmir. Çalışırıq ki, hər hansı bir çətinliklər yaradaq. Əlimizdən gələn qədər çalışırıq ki, müqavilələrinə elə şərtlər qoyaq ki, bizə də faydalı olsun. İstəyirik ki, futbolçular tez bir zamanda bizdən ayrılmasın. Mən Dubaya gedəndə təsadüfən Kadi Borqeslə eyni təyyarədə oldum. Kadidən soruşdum: "Qarabağ" necə idi? O, cavabında "Qarabağ" mənim həyatımda heç vaxt unutmayacağım bir ev idi. Qurban Qurbanovdan təriflə danışdı. Bu enerji, bu mənəviyyat bizdə olduqca, bura gələn oyunçular şahlanacaq. Bu gün sübut etdik ki, "Qarabağ" heç bir futbolçudan asılı deyil.
- Yeni gələnlərin performansını necə dəyərləndirirsiz?
- Razı qaldım. Vaxt lazımdı. Etiraf etməliyəm ki, bu gün böyük həyəcanla oyuna baxırdım. Yenilənmiş komanda idik və qarşımızda təcrübəli rəqib var idi. Şükürlər olsun, yaxşı bitdi.
- Qələbəni Türkiyəyə hədiyyə edirsiz?
- Bu qələbəni Türkiyəyə hədiyyə etmək şərəfdi. Zəfərimizi onlara hədiyyə edirik.
Digər xəbərlər
