"Son zamanlar məsələni səfərdə həll etmək "Qarabağ"da ənənəyə çevrilib" - Tahir Gözəl
Çempionlar Liqasında pley-off matçları keçirilir.
"Qarabağ" "Viktoriya"nı qonaq edib - 0:0. Görüşdən sonra klubun prezidenti Tahir Gözəl jurnalistlərin suallarını cavablandırıb:
"Çox gözəl oyun alındı. Hətta statistikaya da baxdım. Səhv etmirəmsə, 66 faiz top bizdə idi. Bu özü çox böyük göstəricidi. Nəticə istədiyimiz kimi olmadı. Amma azarkeşlər möhtəşəm idi. Əla dəstək var idi, bir ümid var idi. Hələ də ümid var. Çalışacağıq ki, bu inamı Plzendə doğruldaq. Son zamanlar məsələni səfərdə həll etmək "Qarabağ"da ənənəyə çevrilib. Hesab edirəm ki, rəqiblər bu matçda bir-birlərinin oyunlarını oxudular, tanış oldular. Ordakı matç çox önəmli olacaq. Burda bayram ab-havası var idi. Azarkeşlərə təşəkkür edirəm. Səfərdən zəfərlə qayıdacağıq".
- 6 il öncə "Viktoriya" "Qarabağ"ı səfər qolu ilə keçmişdi. Həmin matç yadınızdadımı?
- Əlbəttə ki, yadımdadı. Orda bərabər oyun getmişdi. Yalnız səfər qoluna görə mərhələni keçə bilməmişdik. Bu, bizim ürəyimizdə acı xatirə kimi qalmışdı. Bu günsə, qarşı tərəfin ən uğurlu oyunçusu qapıçısı idi. Çox gözəl qurtarışlar elədi. Onu təbrik edirəm. Amma alınmadı. Futbol belədi.
- Cavab oyunundan nə gözləyirsiz?
- Onların daha öncə gördüyü "Qarabağ"la bu gün gördükləri "Qarabağ" arasında böyük fərq var. Qarşımızdakılar güclü klublardı. "Viktoriya" digərlərindən daha üstündü. Ehtiramla yanaşırıq. Lakin biz səfərə yalnız qələbə üçün gedirik.
- Soyunub-geyinmə otağında ab-hava necə idi?
- Əlbəttə ki, uğur qazandığımızdakı kimi deyil. Amma özümüzdə inam var. Hər kəsin - bütün oyunçularımızın və Qurban Qurbanovun gözündə özümüzə layiq böyük bir inam görürəm.
- Həm milli səviyyəsində, həm də klub səviyyəsində heç vaxt çexlərə qalib gələ bilməmişik. Bu günki oyun da göstərdiki rəqib "Qarabağ"ı yaxşı analiz edib. İlk matç cavab görüşü üçün ümid verir?
- Məncə, alınacaq. Futbolda yaxşı olan tərəf həmişə qazanır. Bu oyunda alınmasa, növbəti oyunda alınacaq. Mən ümidvaram ki, qalib gələcəyik. Asan olmayacaq, amma əlimizdən gələni edəcəyik.
- Çempionlar Liqasının qrup mərhələsinə düşmə ehtimalınızı neçə faiz dəyərləndirirsiz?
- 80 faiz.
İLKİN SULTANLI
Digər xəbərlər
