"Qarabağ" çox yaxşı komandadı. Çempionlar Liqasında çıxış ediblər. Bu mövsüm ÇL-də pley-offa qədər irəlilədilər. Belçika klubları baxıb öyrənməlidir ki, bunu necə etmək olar, necə gəlib ora çatmaq olar, örnək götürülməlidir. Polşa, Macarıstan, İsveçrə çempionlarını uddular. Avropa Liqasında üç böyük ölkənin klubları ilə qarşılaşdılar. "Frayburq"la çox yaxşı oynadılar, həmin matça baxdım. 10 nəfərlə qalanda da üstün futbol nümayiş etdirmişdilər. "Qarabağ"da baş məşqçisinin təsiri üst səviyyədədi və onun sayəsində buralara gəlib çıxıblar.

"Qarabağ"ın Belçika klubları ilə oyunları uzun zaman öncə idi. Biz də önəmli oyunçularımızı itirmişik. Səhv etmirəmsə, bu mövsüm "Qarabağ" evdə bir dəfə məğlub olub. Ötən mövsüm "Marsel"ə uduzublar. Bizim üçün çətindi. Çünki 30 min azarkeş qarşısında oynayacağıq. Bu, bizi həyəcanlandırır. Çətin oyun olacaq. Amma bərabərlik də önəmlidi. İşimizi öz evimizdə həll etməli olacağıq. Az top fərqi ilə uduzmaq belə, yaxşı nəticə sayıla bilər. Unutmayaq ki, "Qarabağ" həm də səfərdə yaxşı oynayır. Bu mövsüm səfərdə "Olimpiakos"u, "Ferentsvaroş"u məğlub ediblər. Bu, o deməkdi ki, "Qarabağ" həm evdə, həm də səfərdə çox yaxşı nəticə göstərir. Məsafə olaraq rəqib də eyni yolu qət edəcək. Belə bəhanələrin arxasında gizlənmək lazım deyil. "Qarabağ"a "Qafqazın "Barselona"sı deyildiyini bilmirdim. Amma meydanda çox yaxşı oyun göstərirlər. "Qarabağ"a hörmətimiz var. Biz "Tottenhem"ə qarşı da oynamışıq. Qorxmaq lazım deyil. Biz "Qarabağ"dan qorxmuruq".