Bu gün səhər saatlarında "Qarabag" Budapeştdən Bakıya döndü.

Football-plus.az xəbər verir ki, Ağdam klubunun prezidenti Tahir Gözəl Heydər Əliyev adına Beynəlxalq Hava Limanında jurnalistlərin suallarını cavabladı.
- 5 illik fasilədən sonra "Qarabağ" Çempionlar Liqasının pley-off mərhələsinə vəsiqə qazandı. Təəssüratınız necədi?
- Çox gözəl, "Qarabağ"a, Azərbaycana yaraşan futbol oldu. Budapeştdən ancaq qələbə ilə yox, möhtəşəm oyunun qalibiyyəti ilə qayıtdıq. Komanda ilə fəxr edir, çox sevinirik. Qarşıdakı oyunu düşünürük. 1 həftə sonra bura gəlirlər. Daha sonra Pilzendə çətin oyun olacaq. Avqustun 23-ü doğum günümdü. İnşallah, orda olacam. Düşünürəm ki, hazırkı "Qarabağ" tarixinin ən güclüsüdü. Dünən gözəl qələbə qazandıq. Kadi Borgesin, Riçard Almeydanın oyunda olması bizə kömək oldu. Düşünürəm ki, qarşıda bizi möhtəşəm oyunlar gözləyir. Ümid edirəm ki, "Qarabağ" bizə daha böyük fəxrlər yaşadacaq.
- "Ferentsvaroş"un prezident ilə oyundan sonra görüşdüzmü?
- Yox! Belə imkanım olmadı. Amma mən onun müsahibəsini oxudum. Deyib ki, bizdən üstün komandaya uduzduq. Təqdirəlayiq hərəkətdi. Sağ olsun.
- "Qarabağ"ın nəticələri Avropada rekorddu. 9 il avrokuboklarda qrup mərhələsinə vəsiqə qazanılır. 14 ildi ki, baş məşqçi ilə yola davam edilir. Bunu necə qiymətləndirirsiz?
- Artıq "Qarabağ"ın adı Avropada, dünyada tanınır. Mən özüm bunun şahidi oluram. Səfərə çıxanda və "Qarabağ"ın prezidentiyəm deyəndə bizi tanıyırlar. İtaliyada restoranda dedilər ki, "Roma" ilə görüşümüzü xatırlayırlar. Artıq "Qarabağ" tanınan brenddi. Buna görə fəxr edirəm. Daim diqqət mərkəzindəyik və oyunçularımıza da tələbat var.
- Hazırda "Qarabağ" azarkeşləri iki yerə ayrılıb. Bəziləri deyir ki, Çempion Liqasında oynamaq, mübarizə aparmaq şərəfdi. Burda yola davam etməyin daha yaxşı olduğunu düşünürlər. Digərləri isə Avropa Liqasında daha irəli getməyin komandaya fayda verəcəyini fikirləşir. Siz bu haqda nə düşünürsüz?
- Mən bunları ayırmazdım. Biz adımıza görə mübarizə aparırıq. Məqsədimiz "Qarabağ"ın adını, ölkəmizi böyük şərəflə dünyada tanıtmaqdı. Çempionlar Liqasındakı oyunlar maddi cəhətdən də "Qarabağ"a çox kömək edir. Bildiyiniz kimi, klubun öz gəliri yoxdu. Ən böyük sponsoru "Azərsun Holdinq"in sayəsində buralara gəlib. Avrokuboklar "Qarabağ"ın gələcəyi üçün çox önəmlidi. Hər şey göstərir ki, biz doğru yoldayıq.
- "Qarabağ"ın uğurunun sirrini sizdən soruşanda nə cavab verirsiz?
- 14 il eyni baş məşqçi ilə yola davam etmək rekorddu. Mənim onlara cavabım odu ki, "Qarabağ"ın özünəməxsus hekayəsi var. Bu klub özünü göstərmək istəyən, pul qazanmaq haqqında fikirləşən prezidentdən və futbolçulardan ibarət deyil. "Qarabağ"ın hekayəsi hamımıza ilham verir. "Qarabağ" adı bizə böyük məsuliyyət verir. "Ferentsvaroş"un azarkeşi oyundan sonra mənə dedi ki, "Qarabağ"da güc var idi. Siz həmin işıq və motivasiya hesabına qalib gəldiz.
- "Viktoriya"dan qisas almaq barədə düşünürsüz?
- "Qarabağ" çox cəsarətli oyun sərgiləyir. Hesab edirəm ki, pley-offda da öz bacarığımızı göstərəcəyik. Klubumuza inanıram.
İLKİN SULTANLI