“Qarabağ” tarixində ikinci dəfə Konfrans Liqasının pley-off mərhələsində meydana çıxacaq.

“Köhlən atlar” bu gün Tofiq Bəhramov adına Respublika stadionunda “Gent”i qəbul edəcək. Oyuna ciddi itkilərlə çıxacaq Ağdam təmsilçisi, həmişə olduğu kimi, azarkeş dəstəyinə bel bağlaya bilər. Elə bunu nəzərə alıb “İmarət” fanklubunun fəalı Elnur Quliyevlə əlaqə saxladıq. Onun “Football-plus.az” saytına dedikləri belə oldu:

“Azarkeş qrupumuzun hazırlığı yüksək səviyyədədi. Gənclərimiz həmişəki kimi, bu dəfə də sürprizləri açıqlamaq istəmir. Müəyyən detalları sosial şəbəkə hesablarımızda bölüşdük. Saat 20.00-da “Gənclik Mall”da toplaşıb “Qarabağ”ımıza mənəvi ruh verməyə gedəcəyik. Bizə qoşulan gənclərin qara geyimdə olmaları məcburidi. Matç ərzində kəsərli şüarlar və pankartlarla yaddaqalan çıxışlarımız olacaq”.

Elnur Quliyev oyunla bağlı gözləntilərini də bölüşdü:

“Qurban müəllimin də dediyi kimi, “Gent”in özünəməxsus oyun üslubu və bacarıqlı futbolçuları var. Komandamızın bəzi hallarda risk alacağını, bəzən isə çox ehtiyatlı oynayacağını düşünürəm. Baş məşqçimizin mətbuat konfransını da dinlədim. O, həm rəqibdə, həm də öz komandasında arxayınlıq yaratmadan danışdı. Bu balansın gözlənilməsi bizdə ilk qarşılaşmanın həyəcanını daha da artırdı. İstənilən halda “Qarabağ”ın qələbəsinə inanırıq. Rəqibin də uğurlarını və performansını nəzərə alaraq, komandamızdan 2 qol ən pis halda heç-heçə gözləyirik”.

KƏNAN BAHADIR