Bu gün “Qarabağ” Çempionlar Liqasındakı növbəti oyununa çıxacaq.

Ağdamlılar 1-ci təsnifat mərhələsində “Lex”i iki oyunun nəticəsinə görə 5:2 məğlub etmişdi. Bu mərhələdə isə rəqib İsveçrə çempionu “Sürix”di. İlk oyun Tofiq Bəhramov adına Respublika stadionunda keçiriləcək.

Maraqlıdı, “Qarabağ”ın azarkeş qrupları bu qarşılaşmaya necə hazırlaşır? Doğma komandalarına dəstək olmaq üçün xüsusi planları varmı? Bu haqda məlumat almaq üçün fanklub nümayəndələri ilə əlaqə saxladıq.

Elnur Quliyev (“İmarət”in idarə heyətinin üzvü): “Həmişəki kimi hazırlaşırıq. Sadəcə, bu dəfə sektorumuzu dəyişmişik. Bu oyunda 5-ci sektorda (əvvəl 2-ci sektor) oturacağıq. Kənardan kiminsə bizim sektora bilet almasını istəmirik. Ona görə də əyləşəcəyimiz sektorun bütün biletlərini özümüz almışıq. Saat 4-dən etibarən “İmarət” azarkeş qrupunun yerlərinin biletləri satışda olacaq. Kim istəsə, bizə qoşula bilər”.

Murad Xudiyev (“Qarabağ ordu”nun üzvü): “Hazırlıqla bağlı heç bir yenilik yoxdu. Əvvəllər komandamıza necə dəstək olurduqsa, indi də eyni qaydada dəstəkləyəcəyik”.

ŞAİR ABDULLA