“Hoffenhaym”da yeni baş məşqçinin təyinatı rəsmiləşib.

Football-plus.az xəbər verir ki, bazar ertəsi Andre Braytenrayterlə yolları ayıran rəhbərlik ona qısa zamanda xələf tapıb.

Braytenrayter komandaya 2022-ci ilin yayında təyinat almışdı. “Hoffenhaym” onun başçılığı altında keçirdiyi 22 oyunda 7 qələbə qazanmış və 11 dəfə məğlub olmuşdu. Zinshaym klubunun rəsmi saytının məlumatına görə, komandanı bundan sonra Pelleqrino Mataratso çalışdıracaq. 45 yaşlı amerikalı mütəxəssis ilə bağlanan müqavilənin müddəti 2025-ci ilin yayına qədər razılaşdırılıb.

Qeyd edək ki, “Hoffenhaym” Mataratso üçün yeni klub deyil. O, bir müddət əvvəl zinshaymlıların strukturunda çalışıb, yeniyetmələrdən ibarət komandaya başçılıq edib, həmçinin baş məşqçinin köməkçisi olub. Amerikalının 2019-22-ci illərdə Almaniyada “Ştutqart”ı çalışdırdığını da xatırladaq.

Bundesliqanın son turunda “Bohum”a 2:5 hesabı ilə uduzan və çempionatda 9 oyundu qalib gələ bilməyən “Hoffenhaym” hazırda 14-cü yeri tutur.