Avropa mətbuatı da Türkiyədə baş verən zəlzələni gündəmdə saxlamaqda davam edir.

Football-plus.az xəbər verir ki, İngiltərənin ''Telegraf'' nəşri ''Qaziantep''in serbiyalı vingeri Lazar Markoviç ilə söhbətləşib.

Bilindiyi kimi Antep zəlzələdən ən çox ziyan görən şəhərlərdən biridi. ''Qaziantep'' bazar günü səfərdə ''Antalyaspor''la qarşılaşdı. Təsadüf nəticəsində klubun bəzi futbolçuları, eləcə də Markoviç ilə onun həmyerlisi Marko Yevtoviç həmin gecəni Antalyada keçirmək qərarına gəlib. Bunun sayəsində onlar heç bir xəsarət almayıblar. Markoviçi dinləyək:

''Hazırda Antalyadayıq. Təsadüf nəticəsində xəsarət almadıq. Çünki oyundan sonra 2-3 günlük icazə alaraq ailə üzvlərimizlə birlikdə Antalyada qalmağa qərar verdik. Məndən başqa daha 10 komanda yoldaşım da burdadı. Amma digər oyunçular şəhərə qayıtmağa üstünlük verdilər. Onlar gecəni həyətdə, maşınlarda və klubun bazasında keçiriblər. Tez-tez əlaqə saxlayıram. Qaziantepdə günorta daha bir dəhşətli zəlzələ oldu. Burda Antalyada da hiss edildi. Çox böyük bir insanlıq faciəsi yaşanır. Türk xalqının acısını bölüşürük. Hadisələrin mərkəzindən çox dəhşətli şəkillər və videolar gəlir. Bizi sadəcə Tanrı qutardı. Qaziantepdə və digər şəhərlərdə olanları gördükcə üzülürəm. Türkiyədə sözün əsil mənasında həyat dayanıb. Necə davam edəcəyimizi, nə olacağını klubdan kimsə bizə deməlidi''.

''Adana Dəmirspor''un tanınmış baş məşqçisi Vinçentso Montella da vətəni İtaliya mətbuatına açıqlamalar verib. Adana təmsilçisi bazar ertəsi ''Ümraniyəspor''la qarşılaşmalı idi və bu üzdən İstanbula gəlmişdi. Bilindiyi kimi oyun təxirə salındı. Montellanı dinləyək:

''Biz İstanbuldayıq. Bizə verilən məlumata görə Adanada zəlzələ çox şiddətli şəkildə hiss olundu və dağıntılar var. Futbolçular ailə üzvlərinə görə narahatdılar. Ara-sıra yenə silkələmələr olur. Çox sayda insan çöllərdə qalıb. Hətta mənim yaşadığım otel boşaldılıb və orda yanğın əmələ gəlib. Çox ağır bir hadisədi. Ailələr üçün dua edirəm. Bizim durumumuz yaxşıdı. Amma Türkiyə üçün çox çətin anlardı''.

Qeyd edək ki, indiyə qədər tanınmış əcnəbi simalardan Luka Modriç, Riyad Mahrez, Mauro İkardi, Aleks de Souza, Felipe Melo, Ştefan Kunts, Jorje Jezuş, Serxio Oliveyra, Lukas Torreyra, Robin van Persi, Didye Droqba, Nikolo Zanyolo, Markao, Anderson Talişka, Lukaş Podolski, Məhəmməd Salah, Serxio Ramos, Kaka Türkiyədəki zəlzələ ilə bağlı paylaşım edib.