Qardaş ölkə Türkiyədə baş vermiş zəlzələdə xəsarət alanlar arasında futbol camiəsinin üzvləri və onların yaxınları da var.

Football-plus.az xəbər verir ki, ''Sivasspor'' məşqçilər korpusunun üzvü Ayhan Tembeloğlu üçün başsağlığı mesajı yayınlayıb.

Baş məşqçi Rza Çalımbayın əsas köməkçisi sayılan Tembeloğlunun Hatayda yaşayan qohum-əqrabasından 15 nəfər dünyasını dəyişib.

''Hatayspor''un özü ilə bağlı bir sevindirici xəbər odu ki, Kristian Atsunu nəhayət, tapmaq və dağıntılar altından çıxarmaq mümkün olub. Türkiyə çempionatının son turunda komandasına qələbə qazandıran qolun müəllifi olan təcrübəli qanalı futbolçu zəlzələdən sonra heç cür tapılmırdı. Amma bu gün səhərə yaxın Atsu xilas edilib və xəstəxanaya çatdırılıb. Klubun idman direktoru Tanər Savutdan isə hələ də xəbər yoxdu.

Onun, eləcə də 1-ci liqa təmsilçisi ''Yeni Malatyaspor''un 28 yaşlı qapıçısı Ahmet Eyup Türkaslanın dağıntıların altından sağ çıxmaq ehtimalı hər ötən saat daha da azalır.

''Sabah'' nəşri həyat yoldaşı tapılan, amma özü tapılmayan qapıçının dünyasını dəyişdiyini iddia etsə də, klub rəsmiləri bu xəbəri təkzib ediblər və axtarışların davam etdiyini vurğulayıblar.