Türkiyə çempionatının ortabab klublarından sayılan “Qaziantep”in bir üzvü ilə bağlı qəribə xəbər yayılıb.

Football-plus.az xəbər verir ki, Antep təmsilçisi bu yay böyük ümidlərlə çexiyalı forvard Tomaş Pekhartı heyətinə qatmışdı. Son 3 mövsümü “Legiya”da keçirən və 2020/21-də 22 qolla Polşa çempionatının bombardiri olan 33 yaşlı forvardla ikiillik müqavilə imzalanmışdı. Amma məlum olub ki, Türkiyəyə uyğunlaşa bilməyən təcrübəli futboçu klubdan ayrılmaq üzrədi. Özü də Pekhartın problemi futbolla yox, daha çox onun psixoloji durumu ilə bağlıdı. Məsələ burasındadı ki, 2017-ci ildə karyerasını “Qaziantepspor”da davam etdirərkən özünü asaraq intihar edən çexiyalı futbolçu Frantsişek Raytoral Pekhartın yaxın dostu imiş. Onlar yığmada da birlikdə top qovublar. Məlum olub ki, dostunun bu şəhərdə intihar etməsini heç cür unuda bilməyən Pekhart Antepə ayaq basdığı ilk gündən psixoloji problem yaşayır. “Qaziantep” rəhbərliyi bir neçə dəfə bu durumdan çıxış yolu tapmağa çalışıb və futbolçuya hər cür yardım göstərib. Çünki yayda klub Pekhartı böyük çətinliklə transfer etmişdi.

Sən demə, Pekhart bir neçə gün öncə heç kimə xəbər vermədən Raytoralın intihar etdiyi yerə gedərək orda belə desək, araşdırma aparıb. Bundan sonra onun psixoloji durumu yenidən pisləşib. Qaziantepdə işıq üzü görən nəşrlərin yazdığına inansaq, Pekhart həmin gündən sonra o qədər qorxu yaşamağa başlayıb ki, hətta ayaqyoluna gedəndə də həyat yoldaşına görüntülü zəng vurub. Bu hadisə bir neçə dəfə təkrar olununca, həyat yoldaşı ilə də problemlər yaşamağa başlayıb. Bütün bu yaşananlardan sonra Pekhart menecerinə zəng vuraraq qəti şəkildə klubdan və Türkiyədən ayrılmaq istədiyini bildirib.

“Qaziantep” rəhbərliyi onun bu istəyini anlayışla qarşılayıb və futbolçuya əlavə problem yaratmaq istəmir. Psixoloji problemlərdən başqa Pekhart şəhərə və kluba da heç cür öyrəşə bilməyib. Maraq üçün bu futbolçunun cari mövsüm “Qaziantep”də 13 rəsmi oyuna çıxdığını və 2 qol vurduğunu bildirək.