Borclar üzündən sıxıntılı günlər keçirən, yanvarın 10-da Cevdət Akınalın istefa verməsi ilə prezidentsiz qalan və son 9 turda qələbəsi olmayan “Qaziantep”də gözlənilən olay rəsmiləşdi.

Football-plus.az xəbər verir ki, klubda Erol Bulut dönəmi rəsmən başa çatdı. Maraqlıdı ki, bunu Qaziantep şəhərinin meri Davut Gül açıqladı! Dünən klubun bazasını ziyarət edən mer jurnalistlərlə görüşdə “Qaziantep”in borcundan, yeni prezidentdən və baş məşqçinin durumundan danışdı. Onun sözlərinə görə, klubun indiki borcu 45 milyon lirə (təxminən 2,2 milyon) təşkil edir.

Amma mövsümün sonuna qədər vergi borcları ilə birlikdə ödənilməli olan məbləğ 200 milyon lirədən çoxdu. Davut Gül bunun normal rəqəmlər olduğunu, Türkiyədə hər klubun borcunun olduğunu və bu çətinlikdən çıxacaqlarını əlavə etdi. O, başqanlıq üçün bəzi iş adamları ilə danışıqlar apardığını, amma onların son anda fikrindən vaz keçdiyini dedi. Hərçənd bunun klubun maddi durumu ilə əlaqəli olmadığını da vurğuladı. Yaxşı və istəkli bir başqana ehtiyac duyduqlarını deyən Gül bu cür ismi qısa müddətdə tapmağın çətin olduğunu əlavə etdi.

O, məşqçi məsələsinə də toxunaraq Bulutla qarşılıqlı razılıqla yolların ayrıldığını açıqladı. Maraqlıdı ki, yalnız bundan sonra klub rəsmi saytında Bulutla vidalaşaraq ona gələcək karyerasında uğurlar arzuladı. 47 yaşlı mütəxəssis ötən mövsümün əvvəlindən antepliləri çalışdırırdı və onun klubla hələ ilyarımlıq müqaviləsi qalmışdı. Ötən mövsümü 15-ci pillədə tamamlayan “Qaziantep” cari “futbol ili”ndə 19 tura topladığı 19 xalla 13-cü pillədə qərarlaşıb.

Maraqlıdı ki, maddi sıxıntılara baxmayaraq “Qaziantep” bu mövsüm Türkiyə kubokunda 1/4 finala adlayıb və burda kubokun son qalibi “Sivasspor”la qarşılaşacaq. Yeni məşqçinin kimliyinə gəlincə, şayiələrə inansaq, Bulutu İsmayıl Kartal əvəzləyə bilər.

O, ötən mövsümün ikinci dövrəsində “Fənərbaxça”nı dirçəltmiş və 2-ci pilləyə qaldırmışdı.