Bu gün Türkiyə çempionatının 23-cü turunda bütün diqqətlər ''Nef Stadionu''na yönələcək.

Lider ''Qalatasaray'' oktyabrın 1-dən bu yana səfərdə qələbəsi olmayan ''Trabzonspor''u qəbul edəcək. Bu da o deməkdi ki, iki komandadan birinin seriyası qırılacaq. ''Qalatasaray''da seriya rəsmi oyunlarda ardıcıl 14 qələbədən ibarətdi. Komanda superliqada 11, kubokda 3 qarşılaşmada ardıcıl qələbələr əldə etməklə daha öncə Türkiyə futbolunda bir mövsümün gedişində heç kimin bacarmadığı bir uğura imza atıb. Son çempion ''Trabzonspor''un seriyası isə böyük rəqiblərə qarşıdı. Belə ki, komanda Abdulla Avcının başçılığı altında ötən mövsümün əvvəlindən bu yana prinsipial rəqiblərdən heç birinə uduzmayıb.

Başqa sözlə desək, Trabzon təmsilçisi 707 gündü ''Beşiktaş'', ''Fənərbaxça'' və ''Qalatasaray''a uduzmur. Son məğlubiyyət 2020/21-in 27-ci turunda ''Fənər''lə ev oyununda qeydə alınıb (0:1). O vaxtdan bu yana qaradənizlilər İstanbul nəhənglərinə qarşı 9 superliqa matçından 4 qələbə, 5 bərabərliklə ayrılıblar. Bu gün kimin seriyası qırılacaq?