Srağagün Türkiyə çempionatının 22-ci turunda “İstanbul BŞ” səfərdə “Kayserispor”a minimal hesabla məğlub oldu.

Bu qarşılaşmada ən çox diqqət çəkən məqam Məsut Özilin start heyətində meydana çıxması oldu. Məşhur yarımmüdafiəçi başakşəhərlilərə gəldiyi gündən bəri ilk dəfə superliqada start heyətində meydana çıxdı. O, çempionatda sonuncu dəfə 320 gün öncə - ötən il martın 20-da “Fənərbaxça”nın heyətində “Konyaspor”la oyunda ilk “11-lik”də oynamışdı. Zatən həmin qarşılaşmanın fasiləsində baş məşqçi İsmayıl Kartal ilə mübahisə etdiyi üçün “Fənərbaxça” karyerası başa çatan Almaniya yığmasının sabiq üzvü yayda “İstanbul BŞ”yə keçmişdi. Amma yeni klubunda da onun işləri qaydasında getmədi. Oktyabrda əməliyyat olunan və 2 aydan artıq oynamayan Özil yenicə sıraya qayıtmışdı. “Kayserispor”la görüşdə çox zəif təsir bağışlayan və meydanda varlığı ilə yoxluğu bilinməyən 34 yaşlı futbolçu fasilədə əvəzləndi. O, zəif oyuna görə futbolsevərlər tərəfindən tənqid atəşinə tutuldu.

Dünən isə Məsut ilə bağlı maraqlı xəbər yayıldı. Əvvəlcə qeyd edək ki, o, heç bir səbəb göstərmədən dünənki səhər məşqinə çıxmadı. Daha sonra isə əsas xəbər gəldi. “Fanatik” nəşrinin əməkdaşı Yakup Çınarın versiyasına görə Özil Kayseri səfərindəki bərbad oyundan sonra artıq yüksək səviyyədə oynaya bilməyəcəyinə qərar verib. Guya komanda yoldaşları ilə vidalaşan ulduz futbolçu karyerasını bitirmək qərarına gəlib. Onun məşqə çıxmamasının səbəbi də məhz budu. Hazırda rəhbərliklə futbolçu arasında müqavilənin qarşılıqlı şəkildə ləğv olunması ilə bağlı danışıqlar aparılır. “İstanbul BŞ”nin Özil üçün vida matçı keçirəcəyini iddia edən mənbələr də var. Amma dünya çempionunun karyerasını bitirməsi ilə bağlı hələ ki nə onun özündən, nə də klub tərəfindən rəsmi açıqlama gəlib. Bu mövsüm Özil başakşəhərlilərin heyətində cəmi 7 rəsmi oyunda forma geyib və hesabına 1 məhsuldar ötürmə yaza bilib.

Xatırladaq ki, 1988-ci il təvəllüdlü Məsut Özil Almaniyada doğulub və “Şalke-04”ün yetirməsidi. O, karyerasıboyu bu klubdan başqa “Verder”, “Real”, “Arsenal”, “Fənərbaxça” və sonuncu dəfə “İstanbul BŞ”də top qovub. Karyerası boyunca 10 titul qazanıb ki, bunlardan biri də 2014-də Almaniya yığması ilə qazandığı dünya çempionluğudu. Əslində Özil 2021-in yanvarında Türkiyəyə böyük ümidlərlə gəlmişdi. O, uşaqlıqdan azarkeşi olduğu “Fənərbaxça” tərəfindən təmtəraqlı şəkildə qarşılanmışdı. Amma Məsut təxminən ilyarımlıq “Fənər” karyerası ərzində yalnız 37 rəsmi oyuna çıxaraq 9 qol, 3 məhsuldar ötürməlik performans sərgiləyə bildi.