Dünən Türkiyə mətbuatında Məsut Özil ilə bağlı paylaşılan bir xəbər gündəmə bomba kimi düşdü.

Football-plus.az xəbər verir ki, ən birinci ''NTV Spor''un yaydığı məlumata inansaq, ''Fənərbaxça'' Özil ilə qarşılıqlı şəkildə anlaşaraq yollarını ayırıb! Amma bu xəbər hələ ki, heç bir rəsmi təsdiqini tapmayıb. Başqa mənbələrin yazdığına görə isə tərəflər arasında hələ anlaşma əldə olunmayıb. Məsutun meneceri Ərkut Söğütün yalnız bu gün Türkiyəyə gələcəyi və danışıqların da bundan sonra başlayacağı deyilir. Bu arada Özilin ''Fənər''dən ayrılacağı təqdirdə bu həftəsonuna qədər Əmrə Belözoğlunun çalışdırdığı ''İstanbul BŞ''yə transfer olunacağı haqda xəbərlər də var.

Xatırladaq ki, dünyaca ünlü ulduz ''Fənərbaxça''ya ötən ilin yanvarında gəlmiş və 3,5 illik müqaviləyə imza atmışdı. Özilin uşaqlıq sevgisi adlandırdığı ''Fənərbaxça'' karyerası gözlənilən qədər uğur alınmadı. Bu ilin martında ''Konyaspor''la oyunun fasiləsində o, baş məşqçi İsmayıl Kartala qarşı etirazını sərt formada bildirincə rəhbərlik tərəfindən əsas heyətdən kənarlaşdırılmışdı. 33 yaşlı futbolçu həmin vaxtdan bu yana yalnız fərdi şəkildə məşq edirdi. Məsut öz paylaşımlarında ayrılmaq niyyətində olmadığını və Türkiyəyə istirahət üçün gəlmədiyini deyirdi. Amma yeni baş məşqçi Jorje Jezuş da onun əsas komanda ilə məşqlərə çıxmasını istəməyərək rəhbərliyin qərarını qüvvədə saxlamışdı. Ümumilikdə Özil ''sarı-lacivərdlilər''in heyətində 36 rəsmi oyunda 8 qol, 3 məhsuldar ötürmə ilə yadda qaldı. Çox güman onun ''Fənərbaxça'' karyerası elə bu göstəricilərdən ibarət olacaq.