“İmişli” PFL-in qərarını gözləyir
Birinci divizionda çıxış edən “İmişli” mövsümün ilk yarısında ev oyunlarını Saatlı Olimpiya Kompleksində keçirib.
Buna səbəb İmişli şəhər stadionun çempionat oyunlarına hazır olmaması idi. Bölgənin eyniadlı təmsilçisinin baş məşqçisi Ruhid Usubov bir müddət öncə qəzetimizə verdiyi açıqlamada qış fasiləsindən sonra doğma azarkeşləri qarşısında çıxış edəcəklərini, arenanın çempionat oyunlarına hazır vəziyyətə gətiriləcəyini söyləmişdi. Təxminən iki həftədən sonra aşağı dəstədə də fasilə başa çatır. Görəsən, İmişli stadionunun durumu necədi?
Bu suala cavab tapmaq üçün komandanın baş məşqçisi ilə əlaqə saxladıq. Ruhid bəy məsələ ilə bağlı bunları söylədi:
“Ümumilikdə stadionumuz çempionat görüşlərini qəbul etməyə hazırdı. Paltardəyişmə otaqlarında, istilik və su sistemində heç bir problem yoxdu. Bizi narahat edən yeganə məqam ot örtüyü ilə bağlıdı. Bir neçə ay öncə toxum səpilsə də, havaların soyuq keçməsi otun istənilən səviyyədə cücərməsinə mane oldu. Bu gün üçün qazon 80 faiz hazırdı. Ancaq bütün suallara PFL-in təftişindən sonra aydınlıq gələcək. Fikrimcə, yazda ot örtüyü ideal səviyyədə olacaq”.
Usubov qış fasiləsində komandada olan dəyişikliklərə də toxundu:
“Mövsümün ilk yarısını “Araz Naxçıvan”da keçirən Nəbi Məmmədovun bizə qoşulduğunu demişdim. Ondan başqa “Sabah”ın U-19 komandasında çıxış etmiş futbolçu ilə anlaşmışıq. İki qapıçı klubu tərk edib. Rafiq Kərimov MOİK-ə keçib. Rafiq Hüseynova isə ilk dövrədə çox şans versəm də, özünü göstərə bilmədiyindən vidalaşdıq. Onların əvəzinə “Mingəçevir”dən Pərvin Zeynalovu “rənglərimizə bağlamışıq”.
Mövsümə o qədər də yaxşı start verməyən “İmişli” uzun müddət sonuncu pillədə qərarlaşsa da, fasilə ərəfəsində bir neçə uğurlu oyun keçirməklə xal ehtiyatını artırmağı bacardı. Baş məşqçi qışdan sonra da uğurlu çıxışı davam etdirmək fikrində olduqlarını dedi:
“Fasilə ərəfəsində komanda uğurlu seriya yaxlamışdı. İnanın, fasilənin olmasını heç istəmirdim. Çalışacağıq fasilədən sonra da azarkeşlərimizi sevindirək. Hazırlıq dönəmində bir yoxlama görüşü keçirmişik. Gəncədə “Kəpəz-2” ilə qarşılaşdıq və oyun 1:1 hesabı ilə başa çatdı. Növbəti görüşümüz səfərdə “Mingəçevir”ə qarşı olacaq”.
RƏŞAD
Digər xəbərlər
