PFL rəsmi müraciət gözləyir – AÇIQLAMA
Birinci divizion təmsilçisi "İmişli"nin baş məşqçisi Ruhid Usubov "Futbol+"in son sayına açıqlama verib.
Mütəxəssis bildirib ki, artıq stadionları istifadəyə tam hazırdı. Yalnız ot örtüyü ilə bağlı müəyyən problemlər var ki, o da tezliklə həllini tapacaq.
Lakin ev oyunlarının İmişli şəhər stadionunda keçirilməsi üçün PFL-in təftişi mütləqdi. Maraqlıdı, adı çəkilən qurum bu prosesi nə vaxt həyata keçirəcək? Bu sualla PFL-in Media və Marketinq Departamentinin rəhbəri Sənan Abdullayevlə əlaqə saxladıq. Onun "Football-plus.az" saytına açıqlaması belə oldu:
“İmişli şəhər stadionu ilə bağlı müzakirələr, sadəcə, şifahi danışıqlar mərhələsindədi. Klub tərəfindən PFL-ə təftişlə bağlı rəsmi müraciət olmayıb. “İmişli”nin öz oyunlarını doğma meydanda keçirmək istəyini anlayışla qarşılayırıq. Amma bunun üçün stadion müvafiq tələblərə cavab verəcək səviyyədə olmalıdı. Klub tərəfindən rəsmi müraciət olacağı halda həmin stadiona baxış keçirilə bilər. Arena birinci divizion oyunlarını keçirmək üçün yararlı olarsa, təbii ki, digər klublara da məlumat verilmək şərtiylə ikinci dövrənin ortalarından “İmişli”nin həmin stadionda oynamaq ehtimalı yarana bilər”.
ŞAİR ABDULLA
