AFFA “Mingəçevir” üçün süni qazon quraşdıracaq
"Mingəçevir" cari mövsüm 1-ci diviziona buraxıldı. Lakin "işıqçılar"ın stadionu, əsasən də ot örtüyü bərbad vəziyyətdədi.
Divizion komandalarının baş məşqçiləri müntəzəm bu məsələni qabardır, futbolçularının orda zədələndiklərini söyləyir. Elə hazırda təlim-məşq toplanışında olan bəzi klublar məhz bu üzdən Yaşar Məmmədzadə adına şəhər stadionunda yoxlama matçı keçirmək istəmir.
Bunu nəzərə alaraq stadionun problemləri ilə bağlı “Mingəçevir”in Müşahidə Şurasının sədri Ruslan Həmidovla danışdıq:
"Çoxları stadionumuzun bərbad olduğunu deyir. Biz ideal və ya yaxşı olduğunu iddia etmirik. Amma hədsiz dərəcədə pisləniləcək səviyyədə də deyil. Uzun müddət elitadan, hətta 1-ci diviziondan uzaq düşmüşdük. Yenidən qurulan komandayıq, yavaş-yavaş hər şeyi həll etməyə çalışırıq. Elə də böyük imkanlarımız yoxdu. Stadionumuzda paltardəyişmə, hakimlər, AFFA nümayəndələri və digər aidiyyatı otaqlar təmir olunub. İsti su problemi yoxdu. Yeganə narahatlığımız qazonla bağlıdı. Yeni ot örtüyü üçün 300 min manatdan çox vəsait lazımdı. Sağ olsun İcra Hakimiyyəti, bələdiyyə və rayonun imkanlı adamları, əllərindən gələni edirlər. AFFA ilə PFL də bacardığı köməyi edir. Zamanla qazonu da yeniləyəcəyik. Bundan başqa, ehtiyat süni meydanı yenidən qurub oyunlarımızı orda keçirməyi düşünürük. AFFA həmin meydanın təmirini üzərinə göyürüb. Onlarla müqavilə də bağlamışıq. Ötən ilin sonlarından zəruri ləvazimatlar, avadanlıqlar alınıb. Sadəcə, hava şəraiti işə başlamağa imkan vermir. Havalar düzələn kimi təmir işləri başlayacaq".
ABDULLA İSMAYILOĞLU
Digər xəbərlər
