Mingəçevir şəhər stadionuna 2 min oturacaq hədiyyə olunub - ÖZƏL AÇIQLAMA
Birinci divizionda mövsüm başa çatdı.
Artıq komandalar növbəti “futbol ili”nin hazırlığına başlayıb. Əsasən də AFFA İcraiyyə Komitəsinin qərarı ilə 1-ci divizionda iştirakına icazə verilən “Mingəçevir” bu yöndə fəaldı.
Görəsən, klub rəsmən nə vaxt fəaliyyətə başlayacaq? “Nur şəhəri” təmsilçisinin planları necədi? Bu və başqa suallara cavab tapmaq üçün klubun İdarə Heyətinin rəhbəri Rövşən Əhmədovla əlaqə saxladıq:“Yaxın vaxtlarda hər şeyə aydınlıq gələcək. Əvvəlcə baş məşqçi ilə bağlı qərar veriləcək. Nəzərdə tutduğumuz bəzi şəxslər var. Lakin istəmirik ki, indidən ad açıqlayaq. Belə olanda sonradan həmin şəxslərdən kimisə seçməyəndə inciklik olur. Amma mayın sonuna kimi bu məsələ həllini tapacaq. İndidən heyətin formalaşdırılmasına da çalışırıq. Əsasən də Mingəçevirdən olan futbolçuları heyətə cəlb etmək istəyirik. Onların əksəriyyətinin klubları ilə mayın sonuna kimi müqaviləsi var. Bu o demək deyil ki, bütün heyət ancaq mingəçevirlilərdən ibarət olacaq. Baş məşqçinin bəzi istəkləri də nəzərə alınacaq”.
Rövşən Əhmədov Yaşar Məmmədzadə adına Mingəçevir şəhər stadionunda ediləcək dəyişikliklər haqda da danışdı:“Ot örtüyü dəyişdirilir. Tribunaların oturacaqları və paltardəyişmə otağı da təmir olunacaq. Hazırda arenanın fasadında müəyyən işlər görülür. 2000-ə yaxın oturacağı Gənclər və İdman Nazirliyi hədiyyə edəcək. Onların quraşdırılmasını da üzərlərinə götürüblər. 3200-ə yaxın oturacaq isə hazırda istifadəyə yararlıdı. Özümüzdə də bir qədər var. Həmin oturacaqları da qırıqların yerinə qoyacağıq.
Başqa təmir işləri isə yerli bələdiyyənin nəzarətindədi. Bura paltardəyişmə otaqları, su və istilik sistemləri daxildi. Bu işlərin hamısına Fərid Qayıbov şəxsən nəzarət edir. Nazir özü bizə başqa məsələlərdə də kömək edir. Buna görə minnətdarıq. Ümid edirəm ki, təmir işləri yeni mövsüm başlayana kimi yekunlaşacaq”.
İLKİN SULTANLI
Digər xəbərlər
