“Mingəçevir” “Energetik”in varisidi? - Klub rəsmisi açıqladı
İcraiyyə Komitəsinin qərarı ilə “Mingəçevir” 1-ci divizionda iştirak etməyə haqq qazandı.
Bu məsələ bir çoxları üçün qaranlıq qaldı. Əsasən də “Xan Lənkəran” cəbhəsi komandanın 3 mövsüm Region Liqasında çıxış etmədiyini bildirərək etiraz etdi. Əlbəttə, bu, haqlı üsyandı. Görəsən, “Mingəçevir” hansı əsasla 1-ci diviziona buraxılıb? Yeni yaranan klub “Energetik”in varisidi?
Suallarımızı “Mingəçevir”in İdarə Heyətinin rəhbəri Rövşən Əhmədova ünvanladıq. Klub rəsmisi məsələ ilə bağlı “Football-plus.az”a açıqlamasında bunları dedi:
“Bir çoxları deyir ki, mingəçevirlilər dava-dalaş saldıqları üçün 1-ci diviziona buraxıldı. 3-4 tərbiyəsizə görə klubun əziyyətinin üstündən niyə xətt çəkilməliydi? Həmin şəxsləri komandadan göndərdik. Əlbəttə, mən də “Xan Lənkəran”ın 1-ci divizionda iştirak etməsini istəyirəm. Amma hüquqi proseslərlə bağlı nəsə deyə bilmərəm. Təbii ki, “Mingəçevir” “Energetik”in hüquqi varisidi. Bütün sənədlərimiz qaydasındadı. Klubun bütün rəhbər strukturlarında çalışan şəxslər “Mingəçevir”də də işləyəcək. “Energetik” və Regional Futbol Federasiyaları İctimai Birliyi yeni yaranan klubun təsisçisidi. Burda qaranlıq nəsə yoxdu. Mən də sosial şəbəkələrdə yazılanları görmüşəm. Amma biz futbola yeni gəlməmişik. Uzun illərdi burda saçımızı ağartmışıq. “Mingəçevir”in sənədləşməsində hansısa yanlışlıq yoxdu”.
İLKİN SULTANLI
