Tennisdə ilin ilk ''böyük dəbilqə'' seriyalı turniri olan və mükafat fondu 550 milyon dollara bərabər olan ''Australian Open'' davam edir.

Bu gün təklərdə kişilərin yarışında adını 4-cü mərhələyə, yəni 1/8 finala yazdıran ilk 8 tennisçinin adına aydınlıq gəlib. Peşəkar Tennisçilər Assosiasiyasının (ATP) reytinqində 20-ci pillədə qərarlaşan Xaren Xaçanovun oyunundan sonra diqqət çəkən bir hadisə yaşandı. Xaçanov 3 saat 32 dəqiqə davam edən oyunda amerikalı Frensis Tiafonu 6:3, 6:4, 3:6, 7:6 hesabları ilə 4 setdə məğlub edərək adını ən güclü 16 tennisçi sırasına yazdırdı. Tennisdə adətən qalib gələn oyunçu qələbədən sonra kameranın üstündə öz ürək sözlərini yazır. 26 yaşlı erməniəsilli Xaçanov da qələbədən sonra kameranın üstündə ''Artsax möhkəm ol'' mənasını verən ''Artsax stay strong'' ifadəsini yazdı. Xaçanov Moskvada böyüsə də, müsahibələrində özünü yarı rus, yarı erməni saydığını deyib və dəfələrlə Ermənistanı ziyarət edib. Göründüyü kimi ermənilərin Qarabağ sevdası hələ də bitmək bilmir. Xaçanovun bu hərəkəti bir neçə gün öncə Qarabağı Ermənistanın ərazisi kimi göstərməyə çalışan ''İnter''li Henrix Mxitaryanın hərəkətinə bənzəyir. AFFA Mxitaryanın hərəkəti ilə bağlı UEFA-ya şikayət etdi. Bəs görəsən Tennis Federasiyası Xaçanovun bu hərəkəti ilə bağlı hər hansı bir addım atacaq və ya şikayət ünvanlayacaqmı?