“Qarabağ” qış fasiləsindən sonra premyer-liqada və Konfrans Liqasında iddialı olmaq niyyətindədi.

Kadinin satışından 5 milyon avro əldə edən Ağdam təmsilçisinin rəhbərliyi maliyyə baxımından Qurban Qurbanova hansısa çətinlik yaratmayacaq. Bu səbəbdən də “köhlən atlar” futbolçu axtarışını sürətləndirib. Bunun səbəbkarı da Qurbanovdu. Çünki təcrübəli mütəxəssis qarşısına hədəf qoyub. O, Konfrans Liqasında çempion olmaq istəyir. Bunu son açıqlamasında da açıq-aydın dilə gətirib. Lakin bu heyətin çempionluq üçün kifayət etməyəcəyini anlayırr. Məhz bu üzdən də Qurbanov keyfiyyətli əcnəbilərin transferində maraqlıdı. Amma məqsəd təkcə legionerlərdən ibarət komanda formalaşdırmaq deyil. Gənc istedadlı futbolçuların da yetişdirilməsi artıq əsas hədəflərdən biridi. Bu səbəbdən də əvəzedici komandanın 4-5 üzvü Antalyaya aparılıb. Burda hədəf yerli gənclərin əsas komandadakı ab-havanı hiss edib, buna uyğunlaşmasıdı. “Rakuv”la yoxlama görüşündə də onların meydana çıxması bunun ilk siqnalları idi.

Lakin yetişdirmə prosesi 2-3 il vaxt ala bilər. Qurban Qurbanov bundan narahat deyil. Elvin Cəfərquliyev, Musa Qurbanlı, İsmayıl İbrahimli, Abbas Hüseynov, Bəhlul Mustafazadə, Şahruddin Məhəmmədəliyev kimi futbolçular hələ uzun müddət oynaya bilər. Məhz adı çəkilənlərin çoxu ilə uzunmüddətli müqavilələr bağlandı. “Şamaxı”da icarədə olan Nihad Quliyevlə Rauf Hüseynli də bu siyahıya qoşula bilər. Qurban Qurbanov onları daim diqqət mərkəzində saxlayır, baş məşqçiləri ilə onlar barədə söhbətləşir.

Bundan başqa, Filip Ozobiçlə Riçard Almeyda kimi “milliləşdirilən” futbolçular, Qara Qarayev azı 1 mövsüm “Qarabağ”da çıxış edə bilər. Bir sözlə, klub qarşıdakı 3-4 il ərzində limitə uyğun və premyer-liqada çıxış edəcək səviyyədə futbolçulara sahib olacaq.

Gördüyünüz kimi, Qurban Qurbanov yerlilər baxımından əziyyət çəkməyəcəyini düşünür. Lakin əcnəbi məsələsi problemlidi. Kadinin boşluğunu doldurmaq çətin olacaq. Bunun üçün qışda ən azı 3 futbolçu transfer ediləcək ki, yeni mövsümə kimi daha güclü kollektiv formalaşdırmaq mümkün olsun. Bunun üçün artıq menecerlər işə başlayıb. Onlar İtaliya, İspaniya, Fransanın ikinci, Norveç, Danimarka, Çexiya, İrlandiya, Şotlandiyanın əsas liqalarından oyunçular axtarır. Bir sözlə, “Qarabağ” artıq böyümək istiqamətində addım atır. Hədəf davamlı şəkildə avrokubokların qrup mərhələsinə vəsiqə qazanmaqla yanaşı, ən azı Konfrans Liqasında çempion olmaqdı...