Hamıya bəllidi ki, “Qarabağ” Çempionlar Liqasında “Lex”lə oyunlara ciddi hazırlaşır.

Ölkənin futbol ictimaiyyəti Ağdam klubunu diqqət mərkəzində saxlayır. Hazırda gündəmdə olan məsələ Kadi Borgeslə bağlıdı. Beer-Şeva "Hapoel"i "Qarabağ"dan yarımmüdafiəçini transfer etməkdə israrlıdı. 400 min avroluq növbəti təklif də geri çevrilib. Ancaq "Hapoel" braziliyalıdan imtina etmək niyyətində deyil. İsrail mətbuatı yazır ki, klub transfer cəhdlərini davam etdirəcək. Beer-Şeva təmsilçisi məbləği bir qədər də artırmağı düşünür. Onlar Kadinin müqavilə müddətinin növbəti mövsümün sonuna qədər olmasından yararlanmaq istəyir. "Hapoel" rəhbərliyi düşünür ki, "Qarabağ" futbolçunu 1 il sonra pulsuz buraxmaqdansa, indi müəyyən məbləğə satmağa razılaşacaq.

Əslində məsələ fərqlidi. Redaksiyamıza bununla bağlı yeni informasiya daxil olub. Qurban Qurbanov Kadinin komandada qalmasını istəyir. Bu səbəbdən də İsrail təmsilçisinin təklifinə “yox” deyilib. İndiki halda klub yuxarıda qeyd olunan məbləğ qarşılığında braziliyalını satmaq istəmir. Çempionlar Liqasının qrupuna düşməyi hədəfləyən “köhlən atlar” bu keçidi lazımsız hesab edir. Avrokuboklarda uğursuzluq olacağı təqdirdə rəhbərlik onu 500 min avroya satmağı planlaşdırır. İndiki məqamda isə mövzu “Qarabağ” üçün bağlanıb.
Növbəti mövzu Kvabena Ovusu ilə bağlıdı. Türkiyə mətbuatında yer alan məlumata görə, “Sakaryaspor” onun keçidində maraqlıdı. Ötən mövsümü “Ankaragücü”də keçirən qanalı üçün TFF 1-ci liqa təmsilçisi 300 min avro təklif edib. Əldə etdiyimiz məlumata görə, Ağdam təmsilçisi hücumçunu buraxmaq istəmir. Qurban Qurbanov ona ümid bəsləyir. Toplanışda özünü yaxşı tərəfdən göstərən qanalı komandanın əsas üzvlərindən biri ola bilər. Bu səbəbdən də ona “11” nömrəli forma verilib. 50 yaşlı mütəxəssisin planı sadədi: Ovusunu yarımmüdafiənin sağında, Xayme Romeronun yerində oynatmaq. Ötən mövsümün ən yaxşısı olan Kadi Borges isə Filip Ozobiçlə birgə mərkəzdə yer alacaq. Bu səbəbdən də baş məşqçi Ovusunun qalmasını lazım bilir.
Redaksiyamıza daxil olan məlumata görə, ağdamlıların daha bir oyunçusu Türkiyə klubunun diqqət mərkəzinə düşüb. Söhbət Kevin Medinadan gedir. Kolumbiyalı müdafiəçini superliqa təmsilçisi “Konyaspor” transfer etmək istəyib. Lakin “Qarabağ” rəhbərliyi, əsasən də Qurban Qurbanov onun komandada qalmasının tərəfdarı olub. Bu səbəbdən də onunla 3 illik yeni müqavilə imzalanıb. Konya təmsilçisi bundan sonra yenə müdafiəçini transfer etmək istəsə də, təklifi geri çevrilib. Görünən budu ki, “köhlən atlar” Çempionlar Liqasında yenidən uğur əldə etmək istəyir. Bu səbəbdən də komandadakı legionerləri saxlamaqda israrlıdı. İndiki halda ağdamlılar UEFA-ya göndərdiyi sifariş ərizəsində hansısa dəyişiklik etməyi planlaşdırmır.

Təbii ki, “Qarabağ”dan ayrılanlar da olacaq. Bunlar daha çox əvəzedici heyətdə çıxış edən futbolçulardı. Məsələn, 2022/23 mövsümündə premyer-liqada çıxış edəcək “Kəpəz” heyətini daha bir futbolçu ilə gücləndirib. Gəncə təmsilçisi “Qarabağ”ın müdafiəçisi Zamiq Əliyevi icarə əsasında transfer edib. Bu xəbəri klubun mətbuat katibi Gündüz Abbaszadə də təsdiqlədi: “Bəli, Zamiq Əliyev “Kəpəz”ə icarəyə veriləcək. Bu, futbolçunun oyun praktikası qazanmasına kömək olacaq”. Qeyd edək ki, Zamiq ötən mövsüm “Qarabağ”ın heyətində cəmi 1 matçda meydanda olub.

Bundan əlavə, digər müdafiəçi Nihad Quliyev də “Qarabağ”dan ayrılacaq. Gənc futbolçu karyerasını premyer-liqada davam etdirəcək. Ağdamlılar 20 yaşlı oyunçunu “Şamaxı”ya icarəyə göndərəcək. Bununla bağlı razılıq əldə olunub. Avstriyaya toplanışa aparılmayan futbolçunun adı həm də UEFA-ya göndərilən iştirak ərizəsinə salınmayıb.

İLKİN SULTANLI