Gözlənilən oldu: Xayme Romero “Qarabağ”ı tərk etdi.

2019-cu ildən Ağdam klubunda çıxış edən ispaniyalı azarkeşlər tərəfindən çox sevildi. Yarımmüdafiəçinin vacib məqamlarda vurduğu qollar da “köhlən atlar”a qələbələr qazandırdı. Xayme “Qarabağ”da ümumilikdə 69 matçda meydana çıxdı. Yarımmüdafiəçi bu görüşlərdə 14 qol vurub, 16 məhsuldar ötürmə edib. İspaniyalının statistik göstəricilərindən ağdamlılar üçün faydalı futbolçu olduğu üzə çıxır. Sadəcə, Xayme bu mövsüm zədədən çox əziyyət çəkdi. Uzun müddət yaşıl meydanlardan uzaq qaldı, əməliyyat olundu, bərpa müddət uzun çəkdi. Yuxarıda sadaladığımız səbəblərə görə Xayme 2021/22 mövsümündə cəmi 11 matçda meydana çıxa bildi. Bu görüşlərdə 1 qol vurdu, 2 məhsuldar ötürmə ilə yadda qaldı.

Onun etdiklərindən çox danışmağa gərək yoxdu. İspaniyalı sözün həqiqi mənasında Ağdam təmsilçisinin ən sevilən futbolçularından idi. Bəs nə üçün “köhlən atlar” onunla yola davam etmədi? Müqavilə müddətinin uzadılmamasının səbəbi nədi? Bu yazıda hamı üçün qaranlıq qalan məsələlərə aydınlıq gətirməyə çalışacağıq.

Qarşıya böyük hədəflərin qoyulması

Həm premyer-liqada, həm də kubokda qalib olan “Qarabağ”ın bir məqsədi var: yenidən Çempionlar Liqasının qrup mərhələsinə vəsiqə qazanmaq. Bu niyyəti həm klub rəhbərliyi mediaya açıqlayıb, həm də futbolçular. Yəni məqsəd Avropanın ən nüfuzlu klub turnirində layiqincə etmək və mümkün qədər irəliləməkdi. Qurban Qurbanov da bu hədəfə uyğun heyət formalaşdırmaq niyyətindədi. Təbii ki, Xayme əsas heyətdə oynamağa layiq futbolçudu. Lakin ispaniyalının xroniki zədəsi “Qarabağ”ın planlarına uyğun gəlmir. Kadi Borgesin də sağ cinah vingeri kimi daha yaxşı çıxış etməsi onun üzərindən xəttin çəkilməsinə səbəb oldu. Həqiqətən də braziliyalının Ağdam təmsilçisinə gəlişi həm futbolçunun özünün inkişafını, həm də klubun nəticələrinin yaxşılaşmasını şərtləndirdi.

“Qarabağ”ın strategiyasının dəyişməsi

Gəlin bir məqamı xatırlayaq. Ağdamlılar çempionluq münasibəti ilə tədbir keçirdi. Həmin gün klub prezidenti Tahir Gözəl mediaya belə bir maraqlı açıqlama verdi:

Bu sözləri hərə bir cür yozdu. “Qarabağ”ın maliyyəsinin azalacağını deyənlər də oldu, klubun yerli futbolçulara daha çox önəm verəcəyini söylənlər də. Hansı olur-olsun, ortada bir plan var. Rəhbər şəxsin açıqlamasından sonra komanda da buna uyğun formalaşdırılır. İndi bəziləri üçün maraqlıdı ki, Xaymenin gedişinin bu məsələyə nə aidiyyatı var? Təbii ki, bu iki məqam bir-birindən asılıdı. İspaniyalı yarımmüdafiənin və ya hücumun sağ cinahında çıxış edir. Ağdam təmsilçisində bu mövqedə oynayan yerli futbolçu var. Söhbət Rüstəm Əhmədzadədən gedir. Millimizin üzvü böyük ümidlərlə “Qarabağ”a transfer olundu. Lakin son mövsümdə özünü yaxşı tərəfdən göstərə bilmədi. Ağdamlılar Ukraynada anadan olan yarımmüdafiəçi ilə 3 illik müqavilə bağlayıb. Təbii ki, bu boş-boşuna atılmış addım deyildi. Qurban Qurbanov Rüstəmi komandaya uyğunlaşdırıb, daha sonra əsas heyət üzvü etmək fikrində idi. Buna uyğun da addım atır. Xaymenin də tez-tez zədələnməsi, təbii ki, təcrübəli mütəxəssisi narahat edən məqam idi. 50 yaşlı məşqçi bu səbəbdən də gənc və istedadlı Rüstəmə yatırım etmək üçün Xayme ilə yolların ayrılmasına razılıq verdi. Çünki rəhbərlik qarşıya bir məqsəd qoyub: nəticə qazanmaqla yanaşı, yerli futbolçu da yetişdirmək.

İspaniyalı getmək istədi

Təbii ki, yazdıqlarımızın hamısı bir-birindən asılı proseslərdi. Ola bilər ki, Xayme özü növbəti mövsüm ehtiyat oyunçular skamyasının daimi sakini olacağını bilərək, müqavilənin uzadılmasına razı olmadı. Mediada ispaniyalı ilə bağlı çoxlu xəbər görürük. “Neftçi”, “Zirə” kimi klublar onunla yaxından maraqlanır. Sözsüz, meneceri də bu informasiyanı ispaniyalıya çatdırıb. Məhz bu amilləri nəzərə alan Romero “Qarabağ”dan getmək istədi. Bir sözlə, 3 illik macəradan sonra ispaniyalı Ağdam klubundan ayrıldı. Onun gedişinin kimin üçün xeyirli olacağını isə zaman göstərəcək. Ümid edək ki, bundan qazanan “Qarabağ” olar...

İLKİN SULTANLI