“Qarabağ” 2021/22 mövsümünün çempionu oldu.

Şəxsən mən düşünürəm ki, bu, o qədər də çətin olmadı. Ağdam təmsilçisi çətinlik çəkmədən mövsümün bitiminə 3 tur qalmış qızıl medalları təmin etdi. Sanki “köhlən atlar”ın qələbəsinə bir az soyuq münasibət bəslənildi. AFFA-nın rəsmi “feysbuk” səhifəsindən başqa premyer-liqada çıxış edən klubların sosial şəbəkə hesabları “Qarabağ”ı çempionluq münasibəti ilə təbrik etmədi. Bu amil “köhlən atlar”ın qələbəsinə kölgə sala bilməz. Bu yazıda nə üçün “Qarabağ”ın rahat çempion olmasından bəhs etmək istəyirəm.

Gəlin, bir az keçmişə qayıdaq. Çox uzağa yox, ötən mövsümə. Ağdam təmsilçisi son turda “Neftçi”yə məğlub olaraq çempionluğu əldən verdi. Bu, sözsüz ki, Qurban Qurbanova təsir etdi. Təcrübəli mütəxəssis səhvlərini təhlil edib, komandadakı boşluqları doldurdu. Lakin əsas heyətin vacib fiqurlarının komandada saxlanılması da Ağdam təmsilçisinin işinə yaradı. Yəni “Qarabağ” yay “transfer pəncərəsi”ndə gücünə güc qatdı. Baxmayaraq ki, bəzi gedişlərdə səhvə yol verildi. Məsələn, yeni transferlərdən bəziləri komandaya uyğunlaşa bilmədi. Söhbət Qaspar Panaderodan gedir. 50 yaşlı mütəxəssis ona şans versə də, ispaniyalı özünü doğrulda bilmədi. Təbii ki, əsas amil heyət və ya transferlərlə bağlı deyil. Dünyanın ən məşhur klubları belə bəzi futbolçulara milyonlar xərcləsə də, alınmayanda alınmır. Beyl, Azar kimi futbolçuları nümunə çəkmək olar. Bu uğurun əsas gizli məqamları tam fərqlidi. Mənim bu yöndə 2 fikrim var. Düşünürəm ki, klub rəhbərliyi ilə baş məşqçi arasında güvən ideal səviyyədə olduğu üçün Ağdam klubu bu mövsüm xarüqələr yaratdı. “Qarabağ” rəsmiləri komandanın çempion və kubokun sahibi olmamasına baxmayaraq, Qurban Qurbanova hər şeyi idarə etmək ixtiyarı verdi. Məhz bu, Ağdam təmsilçisinin əsas sirridi. Lakin çempion “Neftçi”də bu baş vermədi. Rəhbərlik vaxtında transferlər etmədi, Çempionlar Liqasından tutmuş Konfrans Liqası kimi turnirlərin heç birinə “ağ-qaralar” hazır deyildi.

İkinci vacib məqam isə digər klubların “Qarabağ”dan çox zəif olması idi. “Neftçi”dəki problemləri yuxarıda sadaladım. “Sabah” özünə normal məşqçi tapa bilməmişdi. “Qəbələ”də maliyyə probleminin olması, “Zirə”nin Rəşad Sadıqovun rəhbərliyi altında hələ təzə-təzə çiçək açmağa çalışması ağdamlıları bu mübarizədə bir baş üstün edən səbəb oldu.

Mövzunu qısaca belə bitirmək olar. Qurban Qurbanovun rəhbərlik etdiyi kollektiv uğursuzluqdan sonra güclü və ən yaxşı olduqlarına inanaraq rahat çempionluq əldə etdi. Təcrübəli mütəxəssis rəhbərliyin ona inandığını görüb, ölkənin ən yaxşısı olduğunu isbatladı.

İLKİN SULTANLI