“Qalatasaray”la bağlı transfer məlumatlarını da diqqətinizə çatdıraq.

Komandanın hələ ki ən axsayan mövqeyi müdafiənin sol cinahıdı. “Fənərbaxça”ya qarşı son derbidə bu mövqedə məcburiyyətdən Leo Dyubua oynamışdı. Halbuki fransalının əsl mövqeyi sağ cinahdı. Patrik van Anholt artıq gözdən düşüb. Təcrübəli niderlandlı müdafiəçi dəfələrlə şans qazansa da, ümidləri doğrulda bilməyib. Bu mövqedə Əmrə Taşdəmirlə gənc Kazımcan Karataş da var. Amma onların hər ikisi hazırda zədəlidi. Bu üzdən İstanbul nəhəngi diqqətini “Sivasspor”lu Uğur Çiftçiyə yönəldib. “Yiğidolar”ın çalışdırıcısı Rza Çalımbay srağagün verdiyi açıqlamada artıq “Qalatasaray”la ilkin razılıq əldə olunduğunu vurğuladı. Amma dünən sivaslıların başqan vəkili Ərdal Sarılar anlaşmanın əldə olunmadığını və danışıqların davam etdiyini bildirdi. Əslində Çiftçi ilə “Qalatasaray” arasında razılıq çoxdan əldə olunub. Sadəcə, “Sivasspor” qarşı tərəfdən müəyyən məbləğlə yanaşı, Əmrə Taşdəmiri də tələb edir. Bu futbolçu isə çox sərt qışı ilə tanınan Sivasa yollanmaq istəmir. 2018-dən bəri “Sivasspor”un şərəfini qoruyan və Türkiyə yığmasında 1 oyun keçirən 30 yaşlı Çiftçi ötən yay klubu ilə olan müqaviləsinin müddətini 2027-yə qədər uzatmışdı. Bu mövsüm 22 rəsmi oyunda 5 məhsuldar ötürmə verən futbolçunun dəyəri 2,5 milyon avrodu. Uğur Çiftçidən başqa “Qalatasaray” “Antalyaspor”lu Güray Vural, “Dandi Yunayted”li Əziz Behiç və “Kolo-Kolo”lu Qabriel Suzao ilə də maraqlanır. Okan Burukun planlarına daxil olmayan Van Anholtlə ümidləri doğrultmayan və hələ də superliqada hesabında qol olmayan Haris Seferoviçə gəlincə, onlar ayrılmağa tələsmir. Van Anholtun klubla hələ ilyarımlıq müqaviləsi var. Mövsümün əvvəlində transfer edilən Seferoviçin ailəsi isə İstanbulda xoşbəxtdi.