''Qalatasaray'' daha bir rumıniyalı ilə yollarını ayırıb.

Bir müddət öncə Olimpiu Morutsanı İtaliyanın B seriyasında çıxış edən ''Piza''ya icarəyə verən İstanbul nəhəngi indi də Aleksandru Çikıldau ilə vidalaşmağı lazım bilib. Dünən məşqə çıxmayaraq Dubaya yollanan 25 yaşlı yarımmüdafiəçi BƏƏ təmsilçisi ''Əl-İttihad Kalba''ya birillik icarəyə verilib. ''Qalatasaray'' qarşı tərəfdən icarə haqqı tələb etməyib. Amma Çikıldaunun 1 milyon avroya bərabər olan illik maaşını ''Əl-İttihad Kalba'' ödəyəcək. ''Aslan'' bu futbolçunu ötən yay ''Universitatya''dan 6,5 milyon avroya transfer edərək onunla beşillik müqavilə imzalamışdı. Amma Rumıniya yığmasının üzvü həmyerlisi Morutsan kimi ümidləri doğrulda bilmədi. Çikıldau ötən mövsüm 43 rəsmi oyunda 5 qol, 4 məhsuldar ötürmə ilə fərqləndi. Bu mövsüm isə o, baş məşqçi Okan Burukun planlarına daxil deyildi. İlk 3 turda Çikıldau cəmi 6 dəqiqə oynamaq şansı qazanmışdı.