Ötən sayımızda “Beşiktaş”ın niderlandlı forvardı Vut Veqhorstun “Mançester Yunayted”ə keçidin astanasında olduğunu xəbər vermişdik.

30 yaşlı futbolçu çərşənbə günü ağrılarının olduğunu bildirərək məşqə çıxmaqdan imtina etmişdi. “Beşiktaş” rəhbərliyi yeni hücumçu tapmadan onu buraxmaq istəmirdi. Amma cümə axşamı Veqhorst baş məşqçi Şenol Günəşlə təkbətək görüş keçirərək səmimi şəkildə ona dərdini anlatdı. Veqhorst bu transferdə pulun heç bir rol oynamadığını və bəlkə də əlinə bir daha belə fürsət düşməyəcəyini deyərək “Yunayted”ə keçmək istədiyini açıq şəkildə bildirdi. Günəş də yönəticilərə “ayrılmaq istəyən oyunçunu zorla saxlamağın bizə heç bir faydası olmayacaq” dedikdən sonra rəhbərlik onu buraxmağa razılıq verdi. Veqhorst əşyalarını toplayaraq, eləcə də komanda yoldaşları ilə vidalaşaraq yerli vaxtla saat 16.20-də ailəsi ilə birlikdə “Yunayted”in İstanbula göndərdiyi xüsusi təyyarəyə əyləşdi və Türkiyəni tərk etdi. Xatırladaq ki, İstanbul nəhəngi bu futbolçunu mövsümün əvvəlində tam pulsuz şəkildə çempionşip təmsilçisi “Bernli”dən birilliyə icarəyə götürmüşdü. Onun illik məvacibi 2,8 milyon avro idi. İndiyə qədər “Qartal” niderlandlıya təxminən 1,5 milyon avro ödəmişdi.

Yeri gəlmişkən, Türkiyə mətbuatının yazdığına inansaq, Veqhorst performans və digər bonuslarla birlikdə almalı olduğu 500 min avrodan çox məbləği “Beşiktaş”a bağışlayıb. “Ağ-qaralar” Veqhorstun “Yunayted”ə keçidindən 3 milyon avro qazandılar. Başqa sözlə desək, komanda faktiki Veqhorstun xidmətindən yarım mövsüm pulsuz yararlandı, üstəlik 1,5 milyon avro irəli düşdü! DÇ-2022-nin 1/4 finalında Argentina ilə oyunda sonradan meydana çıxaraq 2 qol vurmaqla diqqəti çəkən bu futbolçu “Beşiktaş”da 18 rəsmi oyunda 9 qol, 4 məhsuldar ötürməlik performans sərgilədi. Dünən isə Veqhorst Mançesterdə tibbi müayinədən keçərək rəsmi müqaviləyə imza atdı. Yəni o, artıq bu gün baş tutacaq Mançester derbisində meydana çıxa bilər. “Qırmızı şeytanlar” Veqhorstu “Bernli”dən mövsümün sonuna qədər icarəyə götürüblər. Müqavilədə daimi transferlə bağlı maddə yoxdu.