“Beşiktaş”ın şərəfini qoruyan Vut Veqhorstun “Mançester Yunayted”ə mümkün transferi son günlərdə həm Türkiyə, həm də İngiltərə mətbuatının əsas gündəm mövzusudu.

Xatırladaq ki, İstanbul nəhəngi təcrübəli niderlandlı forvardı mövsümün əvvəlində “Bernli”dən pulsuz birilliyə icarəyə götürmüşdü. Onun illik məvacibi 2,8 milyon avrodu. Müqavilədə daha 200 min avro performans mükafatı nəzərdə tutulub. Əslində Veqhorst heç də pis təsir bağışlamır. O, bu günə qədər Türkiyə karyerasında 16-sı superliqa, 2-si kubokda olmaqla meydana çıxdığı 18 rəsmi oyunda 9 qol, 4 məhsuldar ötürməlik performans sərgiləyib. Son turda “Kasımpaşa” ilə ev oyununda qol vurduqdan sonra 30 yaşlı futbolçu elə jestlər etdi ki, dərhal hamı onun ayrılmaq üzrə olduğunu başa düşdü. Və bir andaca məlum oldu ki, Veqhorstun meneceri “Yunayted”lə ilkin razılıq əldə edib! Amma məsələ göründüyü qədər asan deyil. Düzdü, Veqhorstun “Bernli” ilə 2025-ci ilə qədər müqaviləsi var və ilk baxışdan bu klub onu istədiyi yerə sata bilər. Amma digər tərəfdən bu mövsümlük bu futbolçu “Beşiktaş”a məxsusdu. Ona görə də “Beşiktaş”ın da tələbləri nəzərə alınmalıdı. Başqa sözlə desək, “Bernli” “Qartal”ı da “görüm-baxım” eləməlidi. Türkiyə mətbuatındakı xəbərlərə görə “ağ-qaralar” bu məsələdən ən azı 4-5 milyon avro xeyir götürmək istəsə də, sonda 3 milyon avroya razılıq veriblər. Maddi məsələlərdə anlaşma əldə olunsa da, “Beşiktaş”ın daha bir tələbi var. Klub Veqhorstu yalnız onun yerinə oyunçu tapandan sonra buraxmaq istəyir. Bu isə nə futbolçunun özünü, nə “Bernli”ni, nə də “Yunayted”i qane edir. Bu baxımdan ilk qalmaqal dünən yaşandı. Deyilənə görə, Veqhorst İngiltərəyə hələ srağagün yollanmalıymış. Amma “Beşiktaş” icazə vermədiyindən futbolçu əlində bilet olmasına rəğmən, səssiz-sədasız şəkildə məşqə çıxdı. Amma dünən Veqhorst ağrılarının olduğunu iddia edərək komanda ilə məşqə çıxmaqdan imtina etdi və trenajor zalında fərdi məşq etməyə üstünlük verdi. Çox güman, bu məsələ ilə bağlı rəsmi açıqlama ən qısa müddətdə veriləcək.

“Beşiktaş” onun yerini ilk növbədə Vensan Abubakarla doldurmaq istəyir. Təcrübəli kamerunlu forvard həm daha öncə iki fərqli dönəmdə “Beşiktaş”da oynadığından klubu və Türkiyə futbolunu gözəl tanıyır, həm də “Əl-Nəssr”dən ayrıldığına görə hazırda azad agent statusundadı. Deyilənə görə, klub ona 2,5 illik təklif irəli sürüb və cavab gözləyir. Alternativ variant isə “Milan”lı Divok Oricidi. Ümumiyyətlə, bu yerdə qeyd edək ki, “Beşiktaş” bu “transfer pəncərəsi”ndə Veqhorstdan başqa daha 5 əcnəbi futbolçu ilə yollarını ayıra bilər. Söhbət Saiss, N`Kudu, Alli, Muleka və Monterodan gedir.

Bu arada sabiq niderlandlı futbolçular Veqhorstun “Yunayted”ə mümkün keçidinə maraqlı reaksiya veriblər. Öncə sabiq “Fənərbaxça”lı Pyer van Hooydonku dinləyək: “Məncə, Veqhorst Ten Haq və “Yunayted” üçün riskli seçimdi. Düzdü, İngiltərə futbolunu tanıyır. Amma unutmayaq ki, “Bernli”də cəmi 2 qol vura bildi və komanda elitanı tərk etdi. Məsələyə Veqhorst prizmasından baxdıqda, təbii ki, o, bu təklifə sevə-sevə müsbət cavab verəcək. “Yunayted” məni transfer etmək istəsə, mən də düşünmədən razılıq verərəm. Hərçənd bu ifadəm “Yunayted”liləri sevindirəcəksə, onu da əlavə edim ki, Veqhorst Türkiyədə çox yaxşı oynayır. Amma məncə, Veqhorst “Yunayted”ə lazım olan futbolçu deyil. Bu tipdə hücumçu axtarırlarsa, Lük de Yonq həm hava toplarında, həm də başqa aspektlərdə ondan güclüdü”. Sabiq “Barselona”lı İbrahim Afellayı dinləyək: “Veqhorst, sadəcə, ucuz bir alternativ variantdı. Maddi baxımdan “Yunayted” üçün riskli bir transfer sayılmır. Rəqib qapandığı təqdirdə və oyun bir qapıya getdiyi durumlarda Veqhorst kimi oyunçuya ehtiyac duya bilərlər. Amma “Yunayted” dünyanın ən böyük klublarından biridi. Məncə, yalnız arxası qapıya tərəf oynaya bilən bir hücumçudan daha artığına ehtiyacları var”. Ən sərt açıqlamanı isə sabiq “Qalatasaray”lı Uesli Sneyder verib: “Bəlkə bu bir zaraftdı? Reallığa oxşamır. Realdısa, çox qəribə və məntiqsiz bir transfer olacaq. “Yunayted”in indi Veqhorsta ehtiyacı varmı? İngiltərənin özündə Veqhorst tipli 300 hücumçu tapmaq olar! Onun DÇ-də Argentinaya vurduğu hiyləgər qolu hamı gördü. İngiltərədə belə şeylər keçmir”.