Futbolçu kimi kifayət qədər parlaq karyeraya malik olan və hətta “Bavariya” ilə 2013-də Çempionlar Liqasını qazanan ukraynalı Anatoli Timoşukla bağlı xəbər var.

Bilindiyi kimi, Timoşuk 2017-ci ildən Rusiya təmsilçisi “Zenit”də işləyir və köməkçi-məşqçi funksiyasını icra edir.

Football-plus.az xəbər verir ki, o, futbolçu kimi də 2013-15-ci illərdə bu klubun şərəfini qoruyub. Düşünmək olardı ki, Rusiyanın ötən ilin fevralından etibarən Ukraynaya qarşı həyata keçirdiyi hərbi təcavüzdən sonra Timoşuk bu ölkəni tərk edəcək. Çünki Rusiyada oynayan və işləyən bütün ukraynalılar məhz belə addım atdı. Amma o, bunu etmək əvəzinə səssiz-sədasız şəkildə işini davam etdirmək qərarına gəldi. İndiyə qədər də Timoşuk bu amansız müharibə və həmyerlilərinin qətlə yetirilməsi barədə bir kəlmə də danışmayıb! Bu üzdən onun Ukraynada faktiki vətən xaini elan edilməsi təəccüblü deyil. Onun Ukraynada bütün titullarının və hüquqlarının əlindən alınması barədə məsələ uzun müddətdi müzakirə olunurdu. Yanvarın 7-də Ukrayna prezidenti Vladimir Zelenski bununla bağlı yeni fərman imzaladı. Onun qərarına əsasən 119 rusiyalı və ukraynalı mədəniyyət xadimi, idman adamına qarşı sanskiya tətbiq olunacaq. Onların arasında Timoşuk da var. Bu da o deməkdi ki, “Zenit”in məşqçisinin Ukrayna ərazisindəki bütün mülkləri 10 illiyə müsadirə olunub. Eyni müddətə Timoşukun ölkəyə girişinə qadağa qoyulub. Eləcə də onun Ukraynada qazandığı bütün titullar, fəxri mükafatlar və adlar əlindən alınıb!

Timoşuk 2000-16-cı illərdə Ukrayna yığmasının şərəfini qoruyub. Bu müddətdə 144 oyun keçirərək 4 qol vurub və oyun sayına görə yığmada rekordçudu. Sanskiyaya düşən 119 nəfərdən yalnız ikisi Ukrayna vətəndaşıdı. Timoşukdan başqa bu, aparıcı Janna Badoyevadı. Bu xanım 2019-dan Ukrayna vətəndaşlığından imtina etsə də, sənədlərdə hələ də ukraynalı kimi qeyd olunur.

Qeyd edək ki, Timoşuk 2000-16-cı illərdə Nadejda Navrotskaya ilə ailəli olub və 2009-cu ildə onların əkiz qızları dünyaya göz açıb. Amma bu cütlüyün daha sonra uzun və qalmaqallı boşanma prosesi olub. Sabiq futbolçu 2017-ci ildən bəri qeyri-rəsmi olaraq rusiyalı yazıçı, rəssam Anastasiya Klimova ilə birlikdə yaşayır. Şayiələrə inansaq, onların övladı da var. Bundan başqa, Timoşukun Sankt-Peterburqda şəxsi biznesinin olduğu da deyilir.