Anatoli Timoşukun qorxduğu başına gəlib.

Ukrayna Futbol Assosiasiyasının (UFA) İntizam Komitəsi (İK) milli komandanın sabiq yarımmüdafiəçisi ilə bağlı sərt qərarlar verib. Ölkə ictimaiyyəti “Zenit”də məşqçilik edən 42 yaşlı mütəxəssisin Rusiyanın Ukraynaya hərbi müdaxiləsindən sonra ölkəsinə dəstək üçün heç bir addım atmadığını hesab edir. O, nəinki işğalı pisləyən bəyanat verməyib, həmçinin çalışdığı Rusiya klubunu da tərk etməyib. Bilindiyi kimi, bir çox ukraynalı futbolçularla məşqçilər artıq Rusiya klubları ilə yolları ayırıblar.

İK-nın qərarına əsasən, UFA-dan Timoşuka verilən PRO kateqoriyası üzrə məşqçi lisenziyası geri alınıb. O, Ukrayna çempionatı, kuboku və superkubokunda qazandığı mükafatlardan, milli komandanın sabiq oyunçusu statusundan məhrum edilib. Timoşukun Ukraynada futbol fəaliyyəti ilə məşğul olmasına ömürlük qadağa qoyulub. Həmçinin onun bütün fəxri ad və dövlət mükafatlarının ləğv olunması üçün müvafiq qurumlar qarşısında məsələ qaldırılması da qərara alınıb.

Xatırladaq ki, Timoşuk futbolçu karyerası ərzində “Volın”, “Şaxtyor”, “Zenit”, “Bavariya” və “Kayrat”da oynayıb. O, 2000-16-cı illərdə Ukrayna yığmasında 144 oyun keçirməklə milli komandanın rekordçusudu. Futbolçu həyatını 2016-cı ildə “Kayrat”da başa vuran sabiq yarımmüdafiəçi 2017-ci ilin fevralında PRO kateqoriyalı məşqçi lisenziyası alandan sonra “Zenit”in məşqçilər korpusuna daxil olub.