Anatoli Timoşuk vətəni Ukraynada az qala xalq düşməni sayılır.

Onun Rusiya ilə müharibə başlayandan sonra Ukraynanı müdafiə edən açıqlama verməməsi yerli futbol ictimaiyyətinin kəskin etirazına səbəb olub.

Ukrayna Futbol Assosiasiyasının (UFA) Etika Komitəsi hazırda “Zenit”də köməkçi-məşqçi kimi çalışan Ukrayna yığmasnn sabiq oyunçusu Anatoli Timoşukun bütün titullardan və dövlət mükafatlarından məhrum edilməsi üçün futbol qurumunun rəhbərliyinə müraciət ünvanlayıb. Bu barədə UFA-nın rəsmi saytı məlumat yayıb. Komitəni belə qənaətə gəlməyə 42 yaşlı mütəxəssisin Rusiyanın Ukraynaya hərbi müdaxiləsindən sonra ölkəsinə dəstək üçün heç bir addım atmaması vadar edib. Timoşuk nəinki işğalı pisləyən bəyanat verməyib, həmçinin çalışdığı Rusiya klubunu da tərk etməyib. Halbuki digər ukraynalı futbolçular artıq Rusiya klubları ilə yolları ayırıblar. Komitə UFA-dan Timoşuka verilən PRO kateqoriyası üzrə məşqçi lisenziyasının geri alınmasını, onun bütün fəxri ad və dövlət mükafatlarından, Ukrayna çempionatı, ölkə kuboku və superkubokunda qazandığı titullardan, milli komandanın sabiq oyunçusu statusundan məhrum edilməsini istəyib.

Xatırladaq ki, Timoşuk futbolçu karyerası ərzində “Volın”, “Şaxtyor”, “Zenit”, “Bavariya” və “Kayrat”da oynayıb. O, 2000-16-cı illərdə Ukrayna yığmasında 144 oyun keçirməklə milli komandanın rekordçusu sayılır. Futbolçu həyatını 2016-cı ildə “Kayrat”da başa vuran sabiq yarımmüdafiəçi 2017-ci ilin fevralında PRO kateqoriyalı məşqçi lisenziyası alandan sonra “Zenit”in məşqçilər korpusuna daxil olub.