“Adana Dəmirspor” heyəti gücləndirməkdə davam edir.

Düzdü, komandanın transferləri ötən yaydakı qədər hay-küylü deyil.

Football-plus.az xəbər verir ki, Adana təmsilçisi ötən yay debütant statusunda olsa da, Balotelli, Belhanda, Byarnason kimi tanınmış oyunçuları almış, üstəlik mövsümün gedişində Vinçentso Montella ilə anlaşmışdı. Bu yay hələ ki Henri Onyekuru, Badu Ndiaye, Kevin Rodriges, Yusuf Sarı kimi futbolçuları transfer edən “mavi şimşəklər” daha bir tanınmış oyunçu ilə anlaşıblar. Söhbət _{Yaroslav Rakitski}dən gedir. Təcrübəli ukraynalı futbolçu müdafiənin həm solunda, həm də mərkəzində oynamağı bacarır. Solaxay futbolçu standart zərbələri də əla yerinə yetirir.

Azad agent statusunda olan 32 yaşlı oyunçu ilə “1+1” illik müqavilə imzalanıb. Rakitski postsovet məkanında yetərincə populyar simadı. “Şaxtyor”un yetirməsi olan Yaroslav akademiyanı da nəzərə almaqla həyatının 16 ilini bu kluba həsr edib. Ukrayna ilə Rusiya arasındakı gərgin münasibətlərə baxmayaraq, Rakitski 2018/19-un qış fasiləsində 10 milyon avroya “Zenit”ə transfer olunmuşdu. O vaxt bu transfer böyük ajiotaj doğurmuş və Rakitski Ukraynada az qala vətən xaini elan olunmuşdu. Üstəlik o, yığmanın oyunları zamanı daim dövlət himnini oxumaqdan imtina edirdi. Sankt-Peterburqa yollandıqdan sonra Rakitskinin yığmaya yolu bağlandı.

“Zenit”in liderlərdindən sayılmasına və fanatların sevimlisi olmasına baxmayaraq, Rakitski fevralın 24-də Rusiyanın Ukraynaya hərbi təcavüzünün başlamasından bir həftə sonra komandanı tərk etdi! Apreldən bu yana o, doğma klubu “Şaxtyor” ilə məşq edərək yoxlama oyunlarına da çıxırdı. Əslində onun məhz “Şaxtyor”la rəsmi müqavilə imzalayacağı gözlənilsə də, tərəflər anlaşa bilməmişdi.