Kriştiano Ronaldo gözdən uzaq Səudiyyə Ərəbistanına yollansa da, onun haqda yenə kifayət qədər xəbər var.

Qeyd edək ki, onun yeni klubu “Əl-Nəssr”in “instaqram” səhifəsində izləyici sayı artıq 11 milyonu ötüb. Halbuki Ronaldonun transferinə qədər bu rəqəm heç 1 milyona da çatmamışdı! Müqayisə üçün deyək ki, bu mövsüm ÇL-də pley-offa yüksələn 16 klubun yalnız 9-da izləyici sayı 11 milyondan çoxdu.

“Cənubi Afrika” olayından sonra indi də himn olayı...

Virtual aləmdən keçək real dünyaya. Ronaldolu “Əl-Nəssr” ilk oyununu yanvarın 5-də “Əl-Tai”yə qarşı keçirməli idi. Amma Ər-Riyadda güclü yağış yağdığından Səudiyyə Ərəbistanının 12-ci turu çərçivəsində keçirilməli olan bu qarşılaşma bir gün sonra – yanvarın 6-da oynanıldı. Ronaldonun bu matçda yeni klubunda debüt edib-etməyəcəyi mövzusu ətrafında süni ajiotaj yaradılmışdı. Amma onun oynamayacağı əvvəlcədən məlum idi. Bilindiyi kimi, portuqaliyalı superulduzun 2 oyunluq cəzası var idi. O, ötən mövsüm “Mançester Yunayted”in heyətində “Everton”la oyundan sonra azyaşlı bir fanatın telefonun qırdığı üçün İngiltərə Futbol Assosiasiyası (İFA) tərəfindən bu şəkildə cəzalandırılmışdı. FİFA-nın reqlamentinə görə bir futbolçu ən azı 4 oyunluq və ya 3 aylıq cəzasını çəkməyibsə, bu cəzanı avtomatik yeni klubunda çəkməlidi. “Əl-Nəssr” “Əl-Tai”ni türkiyəli futbolsevərlərə də gözəl tanış olan braziliyalı Anderson Talişkanın 42 və 47-ci dəqiqələrdə vurduğu qollarla 2:0 hesabıyla məğlub edərək liderliyini davam etdirdi. “Əl-Nəssr”in gödəkçəsini geymiş Ronaldo oyunu tribunada özü üçün ayrılmış lojada şəxsi meneceri Riki Requfe ilə birlikdə izlədi. Yeri gəlmişkən, 37 yaşlı futbolçu bu matçda da xoşagəlməz olay yaşadı. Bu, onun Səudiyyə Ərəbistanına ayaq basdıqdan sonra yaşadığı ikinci qəribə olaydı. İlk hal onun mətbuat konfransında yaşanmışdı. Belə ki, Ronaldo çoxsaylı jurnalistlər və bütün dünyadan tədbiri izləyən milyonlarla azarkeşin önündə Səudiyyə Ərəbistanını səhvən Cənubi Afrika ölkəsi adlandırmışdı. Yanvarın 6-da isə onun günahı Səudiyyə Ərəbistanı himni səslənərkən ayağa qalxmaması oldu. Həmin vaxt meneceri ilə söhbət edən Kriştianoya dərhal bu barədə xəbərdarlıq edildi və o, yalnız himnin sonlarında ayağa qalxdı. “Əl-Nəssr” rəhbərliyi “Əl-Tai” ilə matçdan öncə bütün biletlərin tükəndiyini açıqlamışdı. Amma anşlaq olacağı gözlənilən oyunda “Mrsool Park” adlanan və həmin gün ot örtüyü gölməçəni xatırladan 25 minlik stadionun heç yarısı da dolmadı! Kluba yaxın qaynaqların məlumatına görə, bu hal havanın soyuq və yağışlı olması, eləcə də Kriştianonun oynamamsı üzündən baş verdi. Yeri gəlmişkən, Ronaldonun ilk hissədən sonra lojanı tərk etməsi diqqətdən qaçmadı. Amma bir çox mənbələrin iddiasının əksinə, portuqaliyalı stadionu tərk etmədi. O, stadiondakı trenajor zalına yollanaraq ordakı velosipedin üzərində məşq edərək televizordan oyunu izlədi. Hətta Talişkanın vurduğu ikinci qola da orda sevindi.