Bu futbolçu "Zaqatala"nı başqa kluba dəyişdi
Birinci divizionda diqqət çəkən komandalardan biri də "Zaqatala"dı.
Çempionatın ilk dövrəsində bölgə təmsilçisi səfərdə uğursuz çıxış etsə də, doğma meydanda heç bir oyunda uduzmadı. Komanda toplanışa start verib, gedənlər-gələnlər var? Bütün bunlara aydınlıq gətirmək üçün "Zaqatala"nın baş məşqçisi Rüstəm Məmmədovla əlaqə saxladıq. Onun "Football-plus.az" saytına açıqlaması belə oldu:
"Yanvarın 6-da doğma şəhərimizdə toplanışa start verdik. Maqsud Ələkbərov "Sumqayıt-2"yə keçdi. Qalan futbolçular sərəncamımızdadı. Danışıq apardığımız oyunçular var, amma hələ transfer etməmişik. Zaqataladan, kəndlərdən və yaxın rayonlardan potensiallı gəncləri də məşqlərimizə cəlb etmişik. Əslində Qax, Balakən rayonlarından daha çox uşaq tapmaq istəyirik. Malliyə durumumuz pis olduğundan bu mümkün deyil. Onların xərcini qarşılaya bilmirik. Sponsor axtarışımız da nəticəsiz qalıb. Buna rəğmən, məşqlərə cəlb etdiyimiz və ya özləri gələn uşaqların təcrübə toplamaları üçün əlimizdən gələni edirik. Bir neçə yoldaşlıq oyunu keçirməyi planlaşdırırıq. Adətən "Qəbələ"nin əvəzediciləriylə qüvvəmizi sınayırıq. Onlara müraciət etsək də, cavab gəlməyib. Ayın 24-də "Kəpəz-2" ilə yoxlama matçı keçirəcəyik".
ABDULLA İSMAYILOĞLU
Digər xəbərlər
