“Zaqatala” maliyyə, “İmişli” heyət probleminə görə kuboka qatılmayıb
Azərbaycan kubokunun yeni mövsümünə 14 komanda qatılacaq.
Birinci divizion təmsilçilərindən yalnız "Zaqatala" və "İmişli" yarışdan imtina edib. Bunun səbəbini aydınlaşdırmaq üçün komandaların baş məşqçiləri ilə əlaqə saxladıq.
Rüstəm Məmmədov (Zaqatala):
"Çox təəssüf ki, bu mövsüm kubok oyunlarında iştirak edə bilməyəcəyik. Buna səbəb maliyyə sıxıntısıdı. Son vaxtlar ölkədə hər şeyin qiyməti bahalaşır. Əvvəl səfər oyununa getmək 1000 manata başa gəlirdisə, hazırda ən azı 2000 xərcimiz çıxır. Əvvəlcədən püşkün nəticəsinin necə olacağını bilmək də mümkün deyil. Rəqibi doğma publika önündə qəbul edəcəyimizi bilsəydik, yarışa qatılardıq. Hazırkı maliyyə durumumuz başqa turnirlərdə iştirakımıza imkan vermir".
Ruhid Usubov (İmişli):
"Kubok oyunlarından imtinanın əsas səbəbi heyətin zəif və kasad olmasıdı. Hazırda zədəliləri nəzərə almasaq, sərəncamımda 15-16 futbolçu var. Onların da kubok matçlarında zədələnmək riski var. Onsuz da çempionata uğurlu start verə bilməmişik. Bu üzdən bütün diqqətimizi çempionata yönəldəcəyik. Dekabra kimi oyun planında “artırıb” maksimum xal yığmaq istəyirik".
ABDULLA İSMAYILOĞLU
Digər xəbərlər
