Nəhayət, Qətərdə çoxdan gözlənilən dünya çempionatı baş tutdu.

Football-plus.az xəbər verir ki, 2010-cu ilin dekabrında Asiyanın bu kiçik ölkəsinin təşkilatçılıq hüququnu qazanmasının bəyan edilməsi futbol dünyasında nonsens kimi qarşılanmışdı. Bu isə təbii idi. 11581 kvadrat kilometr sahəyə və 2,8 milyon əhaliyə malik Qətərdə yayda havanın hərarəti təxminən 45-50 dərəcəyə bərabər olurdu. Bunu nəzərə alan FİFA futbol tarixində ilk dəfə mundialın iyun-iyun aralığında yox, noyabr və dekabr aylarında keçirilməsinə qərar verdi. Qətərin təşkilatçılıq hüququnu heç də şəffaf mübarizə şəraitində qazanmaması, mütləq monarxiya dövləti olması və ölkədə insan hüquqlarının kobud şəkildə pozulması kimi faktlar da narazılığı artırmışdı.

Hər necə olsa, ərəblər təşkilatçılıq hüququnun öhdəsindən gələ bildilər. FİFA-nın prezidenti Canni İnfantino sonda Qətərdəki dünya çempionatını “ən yaxşı mundial” adlandırdı. Onu da qeyd edək ki, uzun illər ərzində xüsusilə Qərb dünyasından gələn etiraz və narazılıqlar təşkilatçı ölkədə insan hüquqlarının təmini və qorunması sahəsində islahatları qaçılmaz etdi. Yəni yerli hakimiyyət bəzi qanunlarda dəyişikliyə getməli oldu.